Պեկինում կայացել են ԱՄՆ նախագահ Դոնալդ Թրամփի և Չինաստանի նախագահ Սի Ցզինպինի բանակցությունները։
Թրամփը հայտարարել է, որ ԱՄՆ-ի և Չինաստանի հարաբերությունները կարող են հասնել «աննախադեպ մակարդակի» և դառնալ «ավելի լավ, քան երբևէ»։ Նա նաև Սի Ցզինպինին անվանել է «մեծ առաջնորդ»՝ նշելով, որ իր համար պատիվ է նրան ընկեր համարելը։
ԱՄՆ նախագահը շեշտել է, որ Վաշինգտոնը ցանկանում է Պեկինի հետ տնտեսական հարաբերություններ կառուցել լիարժեք փոխադարձության սկզբունքով։ Հայտնի է նաև, որ ամերիկյան պատվիրակության կազմում ընդգրկված են շուրջ 30 խոշորագույն համաշխարհային ընկերությունների ներկայացուցիչներ։
Իր հերթին Սի Ցզինպինը հայտարարել է, որ Չինաստանի և ԱՄՆ-ի միջև դիմակայությունը կհանգեցնի փոխադարձ վնասների, ուստի երկրները պետք է լինեն «գործընկերներ, ոչ թե մրցակիցներ»։ Չինաստանի առաջնորդը նաև կոչ է արել խուսափել «Թուկիդիդեսի ծուղակից»՝ սցենարից, երբ գերտերությունների մրցակցությունն ավարտվում է լայնածավալ հակամարտությամբ։