Եթե անդրադառնանք գների քաղաքականությանը, ապա վերջին տարիներին անշարժ գույքի շուկայում գները միայն ու միայն թանկանում են, որովհետև կառուցապատման ծրագրերում շինարարական ինքնարժեքը թանկանում է։ Այս մասին լրագրողների հետ զրույցում, անդրադառնալով վերջին տարիներին անշարժ գույքի շուկայում գների աճին և ոլորտում առկա խդիրներին, ասաց «Կառուցապատողների հայկական ասոցիացիա» հասարակական կազմակերպության նախագահ Գուրգեն Գրիգորյանը:
«Դա մի կողմից պայմանավորված է միջազգային շուկաներում ապրանքների և նյութերի գներով, մյուս կողմից պետության կողմից վարվող քաղաքականությամբ: Հանրային ծառայություններ մատուցող կազմակերպությունների՝ գազի, ջրի, հոսանքի միացումների հետ կապված լրացուցիչ ծախսերը, որոնք չկային կամ էականորեն քիչ էին, հիմա տասնապատիկ, հարյուրապատիկ անգամներ մեծ են։ Երևան համայնքում ճարտարապետահատակագծային առաջադրանքի, շինարարության թույլտվության գծով և քաղաքաշինական գործընթացների իրականացման հետ կապված թույլտվությունների տրամադրման համար տուրքերը, վճարները, որոնք առաջ կամ չկային, կամ շատ քիչ էին, ներկայումս ահռելի մեծ գումար են կազմում։
Եվ երրորդը, որը, որ էլի հանգեցնում է գների շինարարական ինքնարժեքի մեծացմանը, ընդհանուր ապրանքների և նյութերի, աշխատուժի թանկացումն է և դա իր հերթին հանգեցնում է նաև այս ոլորտում ինքնարժեքի բարձրացմանը։ Բնականաբար ինքնարժեքի բարձրացումն իր մաշկի վրա զգում է սպառողը, կառուցապատողները չեն կարող բնականոն շահութաբերությունից ցածր շահութաբերությամբ մեկնարկել և իրականացնել քաղաքաշինական ծրագրեր, իսկ բնականոն շահութաբերությունը, այսօրվա ինքնարժեքի համեմատ, նորմալ, շուկայական գներ են»,- ասաց Գրիգորյանը:
Հարցին՝ որքան ժամանակ է շարունակվելու այդ տենդենցը, Գրիգորյանն ասաց. «Շուկայում կա այնպիսի կանխավարկած, որ գների անկում է տեղի ունենալու, բայց մեր պատկերացմամբ գների էական տեղաշարժ չի լինի, որովհետև, ինչպես արդեն նշեցին, ինքնարժեքը գնալով թանկանում է»:
