Եվրոպական միության դիվանագիտության ղեկավար Կայա Կալլասը, երկուշաբթի Լոնդոնում կայանալիք եվրոպացի նախարարների «Վայմար+» ձևաչափով հանդիպումից առաջ, կոչ է արել Ռուսաստանին և Ուկրաինային համաձայնության գալ հրադադարի շուրջ։ Նա հայտարարել է, որ առանց կրակի դադարեցման խաղաղության վերաբերյալ բանակցություններ չեն կարող լինել և Մոսկվային մեղադրել է քաղաքական «խաղեր» խաղալու համար։ Այս մասին գրում է kommersant.ru-ն:
«Եթե հրադադար չլինի, ապա կրակի տակ բանակցություններ չեն կարող լինել»,- ասել է Կալլասը:
«Վայմար+»-ի ընթացիկ հանդիպումը վեցերորդն է 2025 թվականի փետրվարին ձևաչափի ստեղծման պահից ի վեր: Դրան մասնակցում են ԱԳ նախարարներ Ֆրանսիայից, Գերմանիայից, Իտալիայից, Լեհաստանից, Իսպանիայից և Եվրամիության ներկայացուցիչներ։ Բանակցություններն առաջին անգամ են ընթանում Լոնդոնում՝ Մեծ Բրիտանիայի արտաքին գործերի նախարար Դեյվիդ Լամիի նախագահությամբ։
Մեծ Բրիտանիայի արտաքին գործերի նախարարությունը հայտնել է, որ բանակցությունների շրջանակում կքննարկվեն համատեղ ջանքերը «եվրոպական անվտանգության ամրապնդման և Ուկրաինայում արդար և կայուն խաղաղություն ապահովելու և ռուսական ագրեսիան հետ մղելու համար»:
