Հայաստանի արտգործնախարար Արարատ Միրզոյանը հրավիրվել է Ռուսաստան, նրա այցը կարող է կայանալ շուտով։ Այս մասին ՌԴ ԱԳ նախարար Սերգեյ Լավրովը հայտարարել է 2024 թվականին ռուսական դիվանագիտության արդյունքների ամփոփմանը նվիրված մամուլի ասուլիսում, փոխանցում է ՏԱՍՍ-ը։
«Մեր երկխոսությունը շարունակվում է: Արարատ Միրզոյանը հրավիրվել է Ռուսաստանի Դաշնություն. Նա ընդունել է հրավերը, սպասում ենք նրան։ Հուսով եմ՝ այցը շուտով կկայանա», – ընդգծել է Լավրովը։
Նա նշել է, որ պաշտոնական մակարդակով Մոսկվայի և Երևանի հարաբերությունները հեշտ չեն։
Հունվարի 14-ին Հայաստանի ԱԳՆ-ն հայտարարել է, որ Հայաստանի արտգործնախարար Միրզոյանը և ԱՄՆ պետքարտուղար Էնթոնի Բլինկենը Վաշինգտոնում կստորագրեն ՀՀ-ԱՄՆ ռազմավարական գործընկերության մասին փաստաթուղթ:
Սրան արձագանքելով՝ ՌԴ նախագահի մամուլի քարտուղար Դմիտրի Պեսկովն ասել էր, որ Հայաստանի և ԱՄՆ-ի միջև ռազմավարական գործընկերության զարգացումը Երևանի ինքնիշխան իրավունքն է:
«Բոլոր երկրների, այդ թվում՝ ԱՄՆ-ի հետ հարաբերությունները զարգացնելը Հայաստանի ինքնիշխան իրավունքն է: Ռուսաստանի Դաշնությունը մտադիր է կառուցել իր կապերը Հայաստանի հետ»,- ասել է Պեսկովը՝ միևնույն ժամանակ ընդգծելով, որ ԱՄՆ-ն երբեք կայունացնող դեր չի խաղացել Հարավային Կովկասում, ավելի շուտ՝ ընդհակառակը:
