ԱԺ-ում ֆինանսների նախարար Վահե Հովհաննիսյանը ներկայացնում է 2025 թվականի պետական բյուջեի փոփոխված տարբերակը:
Նրա խոսքով՝ 2025 թվականի պետական բյուջեի նախագծում դրված ՀՆԱ-ի վերագնահատման ի հայտ եկած նոր իրողությունները նախագծում արտացոլելու, ինչպես նաև բյուջեի նախագծման հիմքում դրված նոյեմբերի մեկի փոխարժեքով վերահաշվարկելու արդյունքում վերանայվել են 2025 թվականի պետական բյուջեի նախագծի եկամուտները, ծախսերը և դեֆիցիտը:
«2025 թվականի բյուջեի վերանայված նախագծով ՀՆԱ-ն կանխատեսվել է 10 տրիլիոն 891 մլրդ դրամ, տնետեսական աճը 5.1 տոկոս, նշված ցուցանիշները սկզբնական նախագծի համեմատ փոփոխվել են նվազման ուղղությամբ` համապատասխանաբար 158 մլրդ դրամով և 0.5 տոկոսային կետով:
Պետական բյուջեի եկամուտները կկազմեն 2 տրիլիոն 837 մլրդ դրամ, որը նախնական տարբերակի համեմատ պակաս է 35.5 մլրդ դրամով: Նշված նվազեցումը հիմնականում պայմանավորված է ՀՆԱ-ի վերագնահատման արդյունքում հարկային եկամուտների նվազեցումով:
Հարկային եկամուտները նվազել են 39.6 մլրդ դրամով, պաշտոնական դրամաշնորհները ավելացել են 1.6 մլրդ դրամով: Այլ եկամուտների 2.6 մլրդ դրամով ավելացումը պայմանավորված է առանձին եկամտատեսակների գնահատումով, ինչպես նաև փոխարժեքի փոփոխությամբ»,- ասաց նա:
Նախարարի տեղեկացմամբ՝ պետական բյուջեի ծախսերը կկազմեն 3 տրիլիոն 441 մլրդ դրամ, որից ընթացիկ ծախսերը 2 տրիլիոն 706 մլրդ դրամ, իսկ կապիտալ ծախսերը 734 մլրդ դրամ: «Բյուջեի ծախսերը 1-ին փուլի համեմատ նվազել են 40.8 մլրդ դրամով, ընդ որում ընթացիկ ծախսերը նվազել են 42.4 մլրդ դրամով, իսկ կապիտալ ծախսերը աճել են 1.7 մլրդ դրամով»,- նշեց Հովհաննիսյանը:
Նրա խոսքով՝ պետական բյուջեի պակասուրդը պահպանվել է ՀՆԱ-ի 5.5 տոկոսի մակարդակում և կազմում է 604 մլն դրամ:
«Կանխատեսվում է, որ 2024 թվականի ավարտին գլոբալ պարտքը կանցնի 100 տրլն դոլարը, սա կազմում է աշխարհի ՀՆԱ-ի 93 տոկոսը, այսինքն միջին պարտք հնա հարաբերակցությունը կազմում է 93 տոկոսը, Հայաստանում այդ ցուցանիշը այս տարվա վերջին կլինի մոտ 54.3 տոկոսի մակարդակի, սակայն այն կշարունակի գտնվել կառավարելի մակարդակում:
Հաստատված միջնաժամկետ ծախսային ծրագրի ծախսերի համեմատ 2025 թվականի բյուջեն կարողացել ենք կրճատել ՀՆԱ-ի մեջ գրեթե 1 տոկոսով: Դեֆիցիտը 2024 թվականի նկատմամբ ավելացել է 0.9 տոկոսային կետով և հարկեր-ՀՆԱ-ն ավելանալու է 0.7 տոկոսային կետով այս բյուջեով: Այստեղ կարևոր է նշել, որ մենք ոչ թե բարձրացնում ենք հարկերը, այլ բարձրացնում ենք վարչարարության արդյունավետությունը և չեղարկում ենք այնպիսի արտոնություններ, որոնք չեն ապացուցել իրենց կենսունակությունը»,- ասաց նա:
Հովհաննիսյանն ընդգծեց. «Իհարկե, ներկայիս իրավիճակը հեռու է մեր երազանքներից և այդ առումով այս տարի մեծ ջանք ենք դրել մի քանի էական փոփոխություն իրականացնելու համար: Նշեմ որ փոփոխությունները սկսել ենք արդեն այս տարվա բյուջեով»:
