Արցախցին 30 տարի է կռվել: Ընդ որում, կռվել է երկու ֆրոնտով` մի կողմից Ադրբեջանն էր, մյուս կողմից` Հայաստանում աշխատող գործակալական ցանցը և այդ ցանցը սպասարկող կենդանիները, այս մասին հայտարարել է «Ադեկվադ» միաբանության հիմնադիր Արթուր Դանիելյանը։
Նրա խոսքով՝ ամեն անգամ, երբ մի «կենդանին» պնդում էր, որ Արցախը բեռ է ՀՀ բյուջեի վրա, որ հայաստանցի զինվորներին վատ են վերաբերվում Արցախում, կամ, օրինակ, որ Մարտակերտում սպան, իբր թե, չորս զինվոր է բռնաբարել, Հայաստանում այդ «կենդանիներին» չէին պատժում ու թողնում էին՝ Արցախը միայնակ բոյ տա:
«Մինչդեռ, անկախ այդ ամենից, Արցախում զորամասերը միշտ եղել են ամենակարգապահը, սնունդը՝ լավագույնը: Արցախցի տղամարդկանց մոտ 5%-ը զոհվել է մեզ բոլորիս պաշտպանելով, ևս մոտ 10%-ը վնասվածք է ստացել, ևս մոտ 50%-ը մասնակցել պատերազմներին, ծառայել են բանակում գրեթե բոլորը: Համեմատության համար պատկերացրեք, որ Հայաստանից ոչ թե 10,000 մարդ կյանքը տար մարտի դաշտում, այլ՝ 150,000…
Արցախի տնտեսությունը լրջագույն հենարանն էր Հայաստանի համար (և Արցախը հանձնելուց հետո Հայաստանի տնտեսական կոլապսը դա է վկայում): Արցախում չկային ստրիպտիզ ակումբներ, խաղատներ, մուրացկաններ, փողոցները միշտ մաքուր էին, տնտեսական ցուցանիշներն էլ՝ լավագույնը տարածաշրջանում:
Հիմա իմ աչքի առաջ ես ամեն օր տեսնում եմ, որ այդ նույն կարգապահությունը, շնորհքը ու մաքրասիրությունը արցախցիները Հայաստանում են դրսևորում, և սիրում են այս երկիրը ավելին, քան հայաստանցիներից շատերը: Սա օբյեկտիվ իրականություն է, որ բխում է օբյեկտիվ հանգամանքներից: Այդ թվում այն հանգամանքից, որ Հայաստանը միշտ եղել է հազար ու մի տերության դավադրության թիրախ:
Դավադրություն է նաև Արցախցիների հանդեպ ատելության գեներացումը: Սա դիվերսիա է, թշնամու հատուկ օպերացիա: Արցախցիներն էլ պիտի դրան արձագանքեն հենց որպես դիվերսիայի, այսինքն` շարունակեն լինել լավը ու հիշեն, որ, ի թիվս տարատեսակ կենդանիների, Հայաստանում կա ճնշող մեծամասնություն, որը դիմացինի խոսալուց, արցախցու ակցենտը լսելով՝ փորձում է մի ինչ-որ բանով ընդառաջե (այդ թվում նաև մեղքի զգացողությունից ելնելով): Ցավոք, լավություն անողները, ինչպես օրենք, չեն բարձրաձայնում այդ մասին` դա, իրավացիորեն, անհամեստություն համարելով:
Հիշեք, որ ատելության այս ալիքի տակ մնալով՝ մենք բոլորս կորցնելու ենք նաև այս մեր հայրենիքը: Սա դիվերսիա է, դիվերսիա, որի դեմ լավագույն միջոցը սերն է: Ինչքան էլ բարդ լինի, ինչքան էլ ծանր լինի կենցաղը, ինչքան էլ ցավեցնեն դիվերսանտների վիրավորանքները, գտեք ձեր մեջ ուժը՝ տեսնելու լավը ու սիրելու այն: Այս պատերազմում մենք կարող ենք հաղթել ու պետք է հաղթենք»,- նշել է Դանիելյանը։
