Մի քանի ժամ առաջ այս ամբիոնից Նիկոլ Փաշինյանը պնդեց, որ աշխարհը մեզ ընկալում է որպես ազգ-նահատակ, աշխարհը, ցավոք սրտի, մեզ ընկալում է Նիկոլ Փաշինյանով. այս մասին ԱԺ ամբիոնից հայտարարությունների ժամին ասաց «Պատիվ ունեմ» խմբակցության ղեկավար Հայկ Մամիջանյանը:
Մամիջանյանը նշեց, որ նույն երկրների ղեկավարները հրապարակային ծաղրում են Նիկոլ Փաշինյանին:
«Այ, այդպես է մեզ աշխարհն ընկալում, այլ ոչ թե որևէ այլ տարբերակով։ Ես ազգ-նահատակի զավակ չեմ, ես հայ եմ։ Հայ, որն իրեն մի քանի անգամ գերազանցող հակառակորդին հաղթել է պատերազմի դաշտում, իսկ հետո հակառակորդի հետ խոսել է՝ կամ կրակում ենք, կամ բանակցում ենք, մենք երկուսին էլ պատրաստ ենք, սկզբունքով։ Այս նույն ամբիոնից Փաշինյանը պնդում էր, որ անկեղծ չենք»,- ասաց նա:
Ըստ պատգամավորի՝ զավեշտալի է, երբ Փաշինյանն է անկեղծությունից խոսում: «Մարդ, ով որ բացահայտ էլի այս ամբիոնից ասել է, որ ինքը խաբել է հայ ժողովրդին, երբ մինչև 20 թվականը խոսում էր Արցախի և այլ խնդիրների մասին։ Մարդ, ով որ իր նախընտրական ծրագրով և ապա իր կառավարության ծրագրով ուղղակի խաբեությամբ ստացել է մեր քաղաքացիների ձայները։ Հադրութ, Շուշի էր դե օկուպացնում, Մադրիդյանով Արցախյան խնդիր էր լուծում, արդյունքը տեսանք»,- նշեց նա:
Ապա նա անդրադարձավ Նիկոլ Փաշինյանի՝ 18 թվականին Սերժ Սարգսյանի ԱԺ ամբիոնից արված ելույթի մեջբերմանը: «Ինչպես միշտ մեջբերվեց հատվածային: Մեկ անգամ ևս կրկնեմ, մենք երբեք էլ Ադրբեջանի հետ չենք բանակցել, մենք բանակցել ենք միջազգային հանրության հետ, որովհետև բանակցություններն այդպես են վարվում։
Այդ դուք սկսեցիք բանակցել Ադրբեջանի հետ, արդյունքում հանձնեցիք չորս գյուղ, և ձեր ուշադրությունը հրավիրեմ, Տավուշի շրջանում, որ ամենապաշտպանված սահմանի հատվածն էր մեր երկրի, և դա վկայում է, որ այս վեց տարվա ընթացքում այդտեղ որևէ առաջխաղացում թշնամին ունենալ չկարողացավ, արդեն իսկ Ադրբեջանը կառուցում է ամրություններ ձեր հանձնած հատվածներում»,- ասաց նա:
Ինչ վերաբերում է Արցախի ճանաչմանը, Մամիջանյանը հիշեցրեց, որ նախագահ Սարգսյանն ապրիլյան պատերազմի ժամանակ ասել էր, որ եթե պատերազմը տևի յոթ օր, ապա մենք կճանաչենք Արցախի անկախությունը, և ժամանակին համանախագահների առաջ պայման էր դրել, որ եթե, ինչպես 2008 թվականին, ևս մեկ անգամ ՄԱԿ-ում ընդունվի որևէ մի կեղծ, սուտ հակահայկական բանաձև, ապա դա նույնպես կլինի պատճառ, որպեսզի Հայաստանը ճանաչի Արցախի անկախությունը։
«Գիտեք, Փաշինյանի ելույթը ավարտվում էր իր վարչապետության մասին, ես էլ այդպես ավարտեմ։ Այո՛, Նիկոլ Փաշինյանն օր օրի փոքրացող Հայաստանի Հանրապետության վարչապետ է ներկայանում, և դա մեր բոլորի մեղքն ու ամոթն է։ Եվ եթե Նիկոլ Փաշինյանը շարունակի ներկայանալ որպես Հայաստանի Հանրապետության վարչապետ, ապա կշարունակի փոքրացնել մեր պետությունը, ու դա կլինի բոլորիս մեղավորությունը»,- նշեց նա: