«Հրապարակ» թերթը գրում է. «Նիկոլ Փաշինյանն ու կաթողիկոսի հեռացումը պահանջող 10 տիրադավ եպիսկոպոսները հունվարի 5-ին հայտարարեցին Հայ առաքելական եկեղեցու «բարենորոգման» մեկնարկի մասին ու հրապարակեցին, այսպես կոչված, իրենց «ճանապարհային քարտեզը»։ Այդ արարողությունից հետո գործընթացին մասնակից թեմերի առաջնորդները ձեռնամուխ եղան Հայ առաքելական եկեղեցու այլ սպասավորների իրենց կողմը գրավելուն՝ գործադրելով հնարավոր եւ անհնարին ճնշումներ։ Նրանց աջակցում է նաեւ ողջ պետական ապարատը՝ ԱԱԾ-ի մասնակցությամբ։ Հատկապես ակտիվներից է Առաքել արքեպիսկոպոս Քարամյանը, որը, լինելով Կոտայքի թեմի առաջնորդ, փորձում է իր կողմը գրավել կամ ճնշումներով իրեն ենթարկեցնել Կոտայքի մարզի եկեղեցիների հովիվներին: Անցած շաբաթ, ճնշումների ներքո, տիրադավների խմբակին միացան Կոտայքի մարզի Նոր Գեղիի Սբ Հովհաննես եկեղեցու հոգեւոր հովիվ Տեր Շահան քահանա Միրզոյանը, Լեռնանիստի Սբ Աստվածածին, Սբ Ավազան եկեղեցիների հոգեւոր հովիվ Տեր Շնորհք քահանա Մաթեւոսյանը, Չարենցավանի Սբ Փրկիչ եկեղեցու հոգեւոր հովիվ Տեր Համազասպ քահանա Հագեյանը, Գառնու Սբ Աստվածածին եկեղեցու հոգեւոր հովիվ Տեր Սմբատ քահանա Աբրահամյանը, Մայակովսկու Սբ Գեւորգ եւ Արամուսի Սբ Հակոբ եկեղեցիների հոգեւոր հովիվ Տեր Վարդան քահանա Ներսիսյանը: Կոտայքի մարզի մյուս եկեղեցիների հոգեւոր հովիվները չմիացան եկեղեցու «բարենորոգման» ծրագրին եւ ցույց տվեցին, որ իրենց անվերապահ աջակցությունն են հայտնում Մայր Աթոռին ու Գարեգին Երկրորդին:
Մենք զրուցել ենք այս թեմի մեկ այլ հոգեւորականի՝ Ջրվեժի Սուրբ Կաթողիկե եկեղեցու հոգեւոր հովիվ Տեր Հարությունի հետ։ «Եկեղեցին ամեն օր, ամեն վայրկյան բարեփոխվում եւ բարենորոգվում է, եւ 1700 տարեկան լինելը դրա մասին է վկայում: Ես այս հարցին մի պատասխան ունեմ․ ծնողի եւ հոր միջեւ ընտրություն անելու ո՛չ կարողություն ունեմ, ո՛չ ցանկություն, ո՛չ առիթ: Ես հոգեպես ծնունդն եմ Սուրբ Էջմիածնի, հանձնված եմ Կոտայքի թեմի առաջնորդի խնամքին, իմ հոգու, խղճի դեմ նման բան չի լինի։ Ընդհակառակը՝ մի փոքրիկ լավի դիմաց գնահատվել ենք, խրախուսվել ենք: Այս առումով ես ուրիշ բան չունեմ ասելու»,- ասաց նա:
Այն եպիսկոպոսները, որոնք միացել են Փաշինյանի «բարենորոգման» ծրագրին, ճնշումներ են գործադրում քահանաների վրա, փորձել են ճնշել կամ այլ ձեւերով համոզել, որ իրենց միանաք։ «Երբե՛ք, հաշվի առնելուվ նաեւ Կոտայքի թեմի հանգամանքը, երբե՛ք»,- ասաց Տեր Հարությունը: Եթե Փաշինյանը որոշի այս կիրակի Ջրվեժի Սուրբ Կաթողիկե եկեղեցի գալ, պատարագի ժամանակ կզեղչե՞ք կաթողիկոսի անունը։ «Հոգեւոր եղբայրներիցս մեկը վերջերս այսպիսի մի արտահայտություն էր արել, որ ով գալիս է եկեղեցի՝ ամենամեղավորից մինչեւ ամենաարդարը, եկեղեցում տեղ ունի, սիրով կընդունվի, բայց պատարագը մնում է պատարագ, պատարագը վեր է ամեն ինչից: Մենք՝ ինքներս, Սուրբ պատարագի խորհուրդի մեջ ենթարկվում ենք Սուրբ Հոգու ներգործությանը, զորությանը, որպեսզի մեր ձեռքերով Աստված իր խորհուրդը թե՛ կատարի, թե՛ ինքն իրեն բաշխի ժողովրդին, բոլոր նրանց, ովքեր սրտատրոփ սպասում են իրենց բաժնին՝ Քրիստոսին ընդունելուն: Աստված տա՝ այդ ընտրությունն անելու առիթ չունենանք»: Ըստ էության, տեր հայրն աղոթում է, որ Նիկոլ Փաշինյանն իր եկեղեցի չայցելի, եւ ինքը նման ընտրության առաջ կանգնելու առիթ չունենա։ Բայց մենք վստահ ենք, որ իր հերթն էլ է գալու, որովհետեւ եկեղեցին քանդելու մոլուցքից այս մարդիկ հրաժարվելու մտադրություն կարծես թե չունեն եւ ոչ մեկին չեն խնայում»։
Մանրամասները՝ «ՀՐԱՊԱՐԱԿ» օրաթերթի այսօրվա համարում
