Այսուհետ կարող եք գրանցել ձեր երեխայի ծնունդը առցանց եղանակով՝ այցելելով Hartak.am կայք: Այս մասին ֆեյսբուքյան իր էջում հայտնել է արդարադատության նախարար Սրբուհի Գալյանը:
«Դրա համար նախ անհրաժեշտ է ունենալ նույնականացման քարտ և նույնականանալ «Ես եմ» ազգային նույնականացման համակարգում : Հարթակ մուտք գործելուց հետո պետք է ներկայացնեք համապատասխան դիմում, ինչպես նաև նշեք ձեր կողմից մշտապես օգտագործվող էլեկտրոնային հասցե, որի միջեցով ապահովվելու է հետադարձ կապը»,- նշել է նա:
«Քայլերի հերթականությունը հետևյալն է՝ մուտք գործելով հարթակ ընտրեք քաղաքացիական կացության գրանցումներ, ծննդի պետական գրանցումներ, դիմել առցանց: Համակարգը ավտոմատ կերպով ցույց է տալիս ձեր ընտանեկան կարգավիճակը՝ հաստատեք տվյալները և անցեք հաջորդ քայլին: Ձեզ ծննդօգնություն տրամադրած առողջապահական կենտրոնի կողմից երեխայի ծննդյան բժշկական վկայականը պետք է արդեն մուտքագրված լինի համակարգում: Երեխայի տվյալներ բաժնում լրացրեք երեխայի անունը, ազգանուն բաժնում լրացրեք հոր կամ մոր ազգանունը, ազգությունը ՝ հոր կամ մոր ընտությամբ, հասցեն՝ հոր կամ մոր հաշվառման, հանրային ծառայությունների համարանիշը և բժշկական վկայականի հսկիչ համարը մուտքագրելուց հետո երեխայի տվյալներն ինքնաշխատ ներբեռնվում են պետական ռեգիստրից և բժշկական համակարգից: Նշված դիմումի հետ միաժամանակ հնարավոր է դիմում նրկայացնել նաև երեխայի ծննդյան միանվագ նպաստ ստանալու վերաբերյալ՝ հետևելով քայլերի հաջորդականությանը: Դիմումը էլեկտրոնային եղանակով ստորագրելուց և հաստատելուց հետո այն այլևս ենթակա չէ փոփոխման: Դուք դրա ընդունման մասին կստանաք համապատասխան ծանուցում: Գրանցումն ավարտելուց հետո կձևավորվի ծննդի պետական վկայական, որը կուղարկվի ձեր կողմից մատնանշած էլեկտրոնային փոստի հասցեին»,- բացատրել է նախարարը:
