Ադրբեջանի քաղաքացիական հասարակության ներկայացուցիչ Ֆարհադ Մամեդովը, ով վերջերս Երևանում էր, ու ով թիմի հետ հանդիպում է ունեցել ՀՀ ԱԽՔ-ի հետ, Ադրբեջան վերադառնալուց անմիջապես հետո ադրբեջանական լրատվամիջոցի հետ զրույցում Երևանն անվանել է «Իրիվան»:
«Հոկտեմբերի 22-ին հանդիպել եմ Երևանում անցկացվող Հայաստանի և Ադրբեջանի քաղաքացիական հասարակության ներկայացուցիչների մասնակցությամբ երկկողմ կլոր-սեղան քննարկման մասնակիցների հետ։ Բարձր եմ գնահատել Հայաստան-Ադրբեջան հարաբերությունների կարգավորման գործընթացի շրջանակներում նման ձևաչափն ընդգրկող հանդիպումների անցկացումը, որոնք միտված են դրականորեն ազդելու մարդկանց միջև շփումների հաստատմանը: Ընդգծել եմ, որ հանրության տարբեր շերտերի ներգրավվումը միմիայն ամրապնդելու է խաղաղությունը: Քաղաքացիական հասարակության ներկայացուցիչներն իրենց հերթին շնորհակալություն են հայտնել հայկական կողմին միջոցառումը կազմակերպելու և դրական մթնոլորտ ապահովելու համար: Մասնակիցներն ընդգծել են նման նախաձեռնությունների շարունակականության կարևորությունը՝ ուղղված փոխվստահության և համագործակցության ամրապնդմանը»,-գրել էր Արմեն Գրիգորյանը:
Ինչպես տեղեկանում ենք ադրբեջանական ԶԼՄ-ներից, նրանք շրջել են Երևանում:
Ադրբեջանական İCTİMAİ TV-ին, ներկայացնելով Ֆարհադ Մամեդովի հարցազրույցից մի հատված, յութուբյան ալիքում գրել է. «Այցելություն Երևան, «Խոջալուի ցեղասպանություն», Հայաստան, Ադրբեջան, խաղաղության գործընթաց, դիվանագիտական բանակցություններ, կուլիսներից դուրս պահեր, ճանաչում, տարածաշրջանային հարաբերություններ, պատմություն և դիվանագիտություն:
«Երևանում հանդիպման մասնակիցներից մեկը հայտարարություն է արել այցի կուլիսային պահերի մասին։ Նրա խոսքով՝ կողմերի միջև քննարկվել են պատմական հարցեր, այդ թվում ՝ «Խոջալուի ցեղասպանության» շուրջ երկխոսության թեման։ Փորձագետները կարծում են, որ դա կարող է վկայել խաղաղ գործընթացում Հայաստանի նոր դիրքորոշմանը մոտենալու մասին»: