Թուրքիայի ներկայացուցչի հետ քննարկել ենք կարգավորման գործընթացն իր ամբողջ սպեկտրով, այսինքն, բոլոր պայմանավորվածությունները, որ այս ընթացքում ձեռք ենք բերել, քննարկել ենք դրանց իրագործումը: Այս մասին ԱԺ-ում լրագրողների հետ զրույցում ասաց ԱԺ փոխխոսնակ, Հայաստան-Թուրքիա հարաբերությունների կարգավորման հարցով հատուկ բանագնաց Ռուբեն Ռուբինյան անդրադառնալով իր և Հայաստանի հետ հարաբերությունների կարգավորման հարցերով Թուրքիայի հատուկ ներկայացուցիչ Սերդար Քըլըչի հետ վերջին հանդիպման ընթացքում քննարկված թեմաներին:
«Ինչպես գիտեք՝ այդ պայմանավորվածությունների մի մասն իրագործված է, մի մասն իրագործված չէ: Որոշ գործընթացներ կան Անիի պատմական կամուրջի վերականգնման շուրջ, վերջերս Ստամբուլում հանդիպում է տեղի ունեցել տեխնիկական մասնագետների, այս սպեկտրն էլ ենք քննարկել»,- ասաց նա:
Անդրադառնալով Մարգարայի անցակետին՝ Ռուբինյանն ասաց, որ դա այն պայմանավորվածությունն է, որի կատարման համար Հայաստանն իր անելիքն արել է: «Դա այն պայմանավորվածություններից մեկն է, որը մինչ այս պահը չի կատարվել և Հայաստանի մեղքով չէ, որ դա չի կատարվել, որովհետև ինչպես հիշում եք Հայաստանը վերանորոգեց Մարգարայի անցակետը և ամեն ինչ պատրաստ է այդ պայմանավորվածությունն իրագործելու համար և սպասում ենք, որ Թուրքիան կատարի այդ պայմանավորվածությունը»,- ասաց նա:
Հարցին էլ՝ արդյոք Թուրքիան շարունակում է պնդել, որ հայ-թուրքական հարաբերությունների կարգավորումը պայմանավորված է Ադրբեջանի հետ հարաբերությունների կարգավորումով, նա ասաց. «Ես կարող եմ ասել՝ ինչ է պնդում Հայաստանը: Հայաստանը պնդում է, որ Հայաստանը պատրաստ է հենց վաղն ունենալ լիովին կարգավորված հարաբերություններ Թուրքիայի հետ՝ առանց որևէ նախապայմանի, դրանից զատ էլ, ինչպես գիտեք, Հայաստան -Ադրբեջան խաղաղության համաձայնագրի տեքստը համաձայնեցված է: Մենք պատրաստ ենք օր առաջ ստորագրել այդ համաձայնագիրը, այսինքն վարչապետը պատրաստ է դա անել: Մենք առաջարկել ենք Ադրբեջանին սկսել խորհրդակցություններ դրա ստորագրման վայրի և ժամկետի շուրջ»։
Ինչ վերաբերում է Ադրբեջանի կողմից Խաղաղության պայմանագրի ստորագրման ձգձգմանը, Ռուբինյանն ասաց. «Ինձ թվում է, կարիք չկա, ես ասեմ՝ ինչով եմ պայմանավորվում դա, բոլորն էլ գիտեն, որ Ադրբեջանն աշխարհի ամենակառուցողական երկիրը չէ։ Մեր դիրքորոշումը ես հայտնեցի, մնացածն արդեն Ադրբեջանի դաշտում է»:
