Փրկարար ծառայությունը տեղեկացնում է, որ հանրապետության տարածքում եղանակային անբարենպաստ պայմանների պատճառով կան փակ և դժվարանցանելի ավտոճանապարհներ։
Արագածոտնի մարզում փակ են «Ամբերդ» բարձր լեռնային օդերևութաբանական կայանից դեպի Ամբերդ ամրոց և Քարի լիճ տանող ավտոճանապարհները։
Ջերմուկի խաչմերուկից Կապան ավտոճանապարհը փակ է կցորդով բեռնատար տրանսպորտային միջոցների համար։ Կցորդով բեռնատարների համար փակ է նաև Վարդենյաց լեռնանցքը։
Սպիտակի ոլորանները, Սպիտակ–Գյումրի և Վանաձոր–Դիլիջան ավտոճանապարհները դժվարանցանելի են կցորդով բեռնատարների համար։
«Չայնիի ոլորաններ» կոչվող հատվածում, ինչպես նաև Սևանի, Ճամբարակի, Մարտունու, Գավառի, Ապարանի, Արագածի, Աբովյանի, Հրազդանի, Նաիրիի, Սիսիանի, Գորիսի, Աշոցքի և Ամասիայի տարածաշրջանների ավտոճանապարհներին տեղ-տեղ առկա է մերկասառույց։
Վայոց ձորի, Գեղարքունիքի մարզերում (բացառությամբ Սևան քաղաքի), ինչպես նաև Արարատի, Սիսիանի, Գորիսի և Կապանի տարածաշրջաններում տեղում է ձյուն։
Փրկարար ծառայությունը վարորդներին հորդորում է երթևեկել բացառապես ձմեռային անվադողերով և պահպանել ճանապարհային անվտանգության կանոնները։
Ինչ վերաբերում է Լարսին, ապա Վրաստանի ՆԳՆ արտակարգ իրավիճակների դեպարտամենտից և ՌԴ ԱԻՆ Հյուսիսային Օսիայի ճգնաժամային կառավարման կենտրոնից ստացված տեղեկատվության համաձայն՝ Ստեփանծմինդա–Լարս ավտոճանապարհը բաց է բոլոր տեսակի տրանսպորտային միջոցների համար։
