Դուբայում մեկնարկում է քառօրյա աշխատանքային շաբաթվա սահմանման փորձը պետական հիմնարկությունների մի մասի համար։ Այս մասին հայտնում է ՏԱՍՍ գործակալությունը:
Էմիրության կառավարության նախաձեռնությունը, որը կոչվում է «Մեր ճկուն ամառը», նաև ենթադրում է աշխատանքային օրվա կրճատում մինչև յոթ ժամ՝ փորձին մասնակցող պետական ծառայողների համար:
Փորձնական նախագիծը կտևի մինչև սեպտեմբերի 30-ը։ Դրան կմասնակցեն պետական հատվածի 15 հիմնարկություններ, որոնք ընտրել է Դուբայի կառավարության Մարդկային ռեսուրսների կառավարման վարչությունը: Նրանց աշխատակիցները կստանան լրիվ աշխատավարձ, սակայն աշխատավայրում կանցկացնեն կամ տնից կաշխատեն մեկ օր պակաս։
Սեպտեմբերի 30-ից հետո վարչությունը կվերլուծի փորձի արդյունքները։ Գերատեսչությունը նաև կպատրաստի համապատասխան հանձնարարականներ նախաձեռնությունն ընդլայնելու կամ պետական հիմնարկությունների աշխատանքի ռեժիմում այլ փոփոխություններ մտցնելու վերաբերյալ:
