Եկեղեցու դեմ քայլերը սահմանադրական կարգի տապալման օրինակ են. Արթուր Վանեցյան

«Հայրենիք» կուսակցության նախագահ Արթուր Վանեցյանը ֆեյսբուքյան գրառմամբ խիստ քննադատել է Հայաստանյայց Առաքելական Սուրբ Եկեղեցու շուրջ իշխանությունների վերջին քայլերը՝ դրանք որակելով որպես սահմանադրական կարգի տապալման դասական դրսևորում։

Նրա խոսքով՝ ոչ լեգիտիմ հանձնաժողովների ու «համակարգող խորհուրդների» ձևավորումը փաստացի մեկնարկ է տալիս Եկեղեցու պառակտման գործընթացին, որի բոլոր հետևանքների համար իշխանությունը կրում է ուղիղ պատասխանատվություն։ Վանեցյանը վստահություն է հայտնել, որ Հայ Առաքելական Եկեղեցին այս փորձությունից ևս պատվով դուրս կգա՝ կոչ անելով հավատավոր ժողովրդին համախմբվել Մայր Աթոռի շուրջ։

«Հայաստանյայց Առաքելական Սուրբ Եկեղեցու իբր բարենորոգման այն հերթական արարը, որին քիչ առաջ ականատես եղանք, կարելի է գնահատել՝ որպես սահմանադրական կարգի տապալման դասական օրինակ, որին իրավապահ համակարգը, կարծում եմ՝ պետք է անդրադառնա:

Բայց այս ամենում մի կարևոր հանգամանք կուզենայի շեշտել։ Ն. Փ.-ն բազմաթիվ անհաջող փորձերից հետո հասկացել է, որ իր ուժերից վեր է «կայծակնային» արագությամբ հեռացնել Վեհափառին և կազմաքանդել հայկական հոգևոր-ազգային ամենահին կառուցակարգերից մեկը, ուստի դիմում է հայտնի հին մեթոդին՝ անհասկանալի և ոչ լեգիտիմ հանձնաժողովներով և համակարգող խորհուրդներով կոծկել իր հերթական տապալումը։ Բացի այս, դրանց ստեղծմամբ, Ն.Փ.-ն պաշտոնապես մեկնարկում է Հայաստանյայց Առաքելական Եկեղեցու պառակտման գործընթացը և որպես կառավարության փաստացի ղեկավար, գլխավորելով այդ համակարգող խորհուրդ կոչեցյալը, կրում ուղիղ պատասխանատվություն հնարավոր բոլոր հետևանքների համար:

Առաքելական մեր Սուրբ Եկեղեցին սրանից ավելի դժվարին փորձությունների և պայքարի միջով է անցել, այս մեկից էլ վստահաբար պատվով դուրս կգա։ Հենց դրա համար Վեհափառ Հայրապետին որդիաբար խնդրում եմ մեր Սուրբ Եկեղեցուն անմնացորդ աջակցելու հորդորով դիմել հավատավոր ազգին և այս փուլում առնվազն պաշտոնանկ անել տիրադավերին։ Ամեն հայի սրտից բխած, Լսիր այս ձայն, ո՜վ Աստված. Երկար կյանք տուր Հայրապետին, Երկար օրեր Հայոց Հոր. Տեր, անսասան պահիր դու միշտ Քո իսկ հիմնած Մայր Աթոռ»,- գրել է Վանեցյանը: