Ամերիկյան Google տեխնոլոգիական ընկերությունը ստիպված կլինի վճարել 2,4 միլիարդ եվրոյի չափով տուգանք, որը 2017թ. սահմանել է ԵՄ հանձնաժողովը. այժմ Լյուքսեմբուրգում տեղակայված Եվրոպական դատարանը հաստատել է նախորդ ատյանի՝ Եվրոպական ընդհանուր իրավասության դատարանի համապատասխան որոշումը, գրում է գերմանական Bild թերթը:
Տուգանքը սահմանվել է, քանի որ Google-ը գների համեմատության սեփական ծառայությունը տեղադրել է որոնման արդյունքների վերևում և դրանով իսկ չարաշահել է իր գերիշխող դիրքը շուկայում: Google-ը տարիներ շարունակ իր սեփական արտադրանքը՝ Google Shopping-ը, դնում է որոնման արդյունքների վերևում, իսկ մրցակիցներին՝ ամենաներքևի դիրքերում: Google-ի վճարած տուգանքն անմիջապես կգնա ԵՄ բյուջե։
Գերմանական idealo ծառայության հիմնադիր Ալբրեխտ ֆոն Զոնթագը Bild-ին ասել է. «Հիմնական վնասը հասցվել է սպառողներին»:
Ըստ փորձագետի՝ նրանք միջինը 10%-ով ավելի են վճարել։ Google-ը ոչինչ չկասկածող օգտատերերին միտումնավոր ուղղորդում է դեպի ավելի թանկ առաջարկներ: Այժմ idealo-ն նախատեսում է մի քանի միլիարդ եվրոյի վնասի փոխհատուցման հայց ներկայացնել:
«Այսօրվա որոշումը իրավաբանորեն հաստատում է, որ Google-ը գիտակցաբար վնասել է մեզ: Սա հիանալի մեկնարկային կետ է փոխհատուցման վերաբերյալ դատավարության համար», — ասել է մասնագետը: