Հոկտեմբերի 30-ին՝ ժամը 14։00-ին, տեղի կունենա ՀՀ ֆինանսների նախկին նախարար, ՊԵԿ նախկին նախագահ, 71-ամյա Գագիկ Խաչատրյանի գործով դատական նիստը։ Նիստը նախագահում է Հակակոռուպցիոն դատարանի դատավոր Վարդգես Ստեփանյանը։ Այս մասին հայտարարություն է տարածել Գագիկ Խաչատրյանի պաշտպանական թիմը։
«2026 թվականի սեպտեմբերի 2-ին Գագիկ Խաչատրյանն ապօրինի կալանավորվել է և արդեն երկու ամիս է՝ գտնվում է կալանքի տակ։ Նա ունի բազմաթիվ առողջական խնդիրներ, որոնք անհամատեղելի են անազատության պայմաններում պահելու հետ։ Չնայած փաստաբանական խմբի կողմից Գագիկ Խաչատրյանի առողջական վիճակի վերաբերյալ բարձրաձայնումներին և ձեռնարկվող քայլերին՝ հոկտեմբերի 29-ին նրա նկատմամբ ևս երկու ամիս ժամկետով կալանքը երկարաձգելու որոշում է կայացվել։
Նախորդ դատական նիստին Գագիկ Խաչատրյանը գրությամբ հայտնել է դատարանին, որ ցանկանում է անձամբ մասնակցել դատական նիստերին։ Միևնույն ժամանակ, դատարանը նշել է, որ մեղադրյալի մասնակցության և այդ իրավունքից հրաժարվելու հարցը բարձրացնում է, քանի որ պաշտպանական կողմի ներկայացրած փաստաթղթերի համաձայն՝ դատարան տեղափոխվելը և նիստերին ներկա գտնվելը ցավեր են պատճառում Գագիկ Խաչատրյանին։ Դատարանը նշել է, որ բժշկական օգնության և կալանքի պայմանների հարցերն իր իրավասության շրջանակում չեն, քանի որ նա կալանքի տակ է գտնվում այլ քրեական գործով, և առաջարկել է պաշտպանական կողմին քննարկել այդ հարցը։
Պաշտպանները ստիպված են եղել հրաժարվել Գագիկ Խաչատրյանի՝ նիստերին մասնակցության իրավունքից, կարևորելով, որ Գագիկ Խաչատրյանի ներկայությունը դատական նիստերին էական նշանակություն ունի նրա պաշտպանության համար։ Մեղադրանքները վերաբերում են նրա պաշտոնավարման ընթացքում ենթադրաբար կատարված արարքներին, և նա հաճախ պաշտպանների ուշադրությունը հրավիրում է կարևոր հարցերի ու հանգամանքների վրա։ Հետևաբար, նրա մասնակցությունն անհրաժեշտ է լիարժեք և արդյունավետ պաշտպանություն իրականացնելու համար։
Գագիկ Խաչատրյանի առողջական վիճակի և բուժօգնության տրամադրման համար պաշտպանական կողմը փորձել է հասնել նրան, որ ՔԿՀ-ում ապահովվի անհրաժեշտ բուժումը կամ թույլատրվի նրան տեղափոխել քաղաքացիական հիվանդանոց։ Սակայն մինչ այժմ որևէ էական բժշկական միջամտություն չի իրականացվել, իսկ փաստաբանների դիմումներին ՀՀ ԱՆ «Քրեակատարողական բժշկության կենտրոն» ՊՈԱԿ-ը տվել է շրջանցիկ պատասխաններ։ Բյուրոկրատական խոչընդոտների պատճառով սկզբում չի թույլատրվել նաև Գերմանիայից ժամանած՝ Գագիկ Խաչատրյանին նախկինում վիրահատած բժշկի այցը։ Բազմաթիվ դժվարություններից հետո կազմակերպված այցի ընթացքում բժիշկն արձանագրել է նրա առողջական վիճակի կտրուկ վատացումը և ցուցում տվել անհապաղ բուժումն իրականացնել քաղաքացիական հիվանդանոցում։
Հրավիրում ենք ԶԼՄ-ների մեր գործընկերների ուշադրությունն այս հարցի լուսաբանմանը, որը վերաբերում է մարդու առողջությանը սպառնացող վտանգներին և անդառնալի հետևանքների կանխարգելմանը»։
