ԱՄՆ նախագահ Դոնալդ Թրամփի ավագ խորհրդական և օգնական Սթիվ Ուիթքոֆը Breitbart News-ին տված հարցազրույցում ասել է՝ Սպիտակ տունն ակնկալում է, որ առաջիկա ամիսներին տեղի կունենա Աբրահամի խաղաղության համաձայնագրերի հավանական ընդլայնում. նրա կանխատեսմամբ՝ համաձայնագրերին կարող են միանալ և Հայաստանն ու Ադրբեջանը:
Աբրահամի խաղաղության համաձայնագրերը ներդրվել են Թրամփի պաշտոնավարման առաջին ժամկետում: Դրանց նպատակն է տասնամյակների ընթացքում առաջին անգամ համոզել արաբական մի շարք երկրների պաշտոնապես կարգավորել հարաբերությունները Իսրայելի հետ: Համաձայնագրերին առայժմ միացել են ԱՄԷ-ն, Բահրեյնը և Մարոկկոն։
Սակայն Աբրահամի համաձայնագրերի առաջընթացը փակուղու առաջ էր հայտնվել այն բանից հետո, երբ Թրամփը հեռացել էր Սպիտակ տնից՝ տեղը զիջելով դեմոկրատ Ջո Բայդենին. վերջինիս նախագահության ժամանակ նոր երկրներ չեն միացել համաձայնագրերին:
Ուիթքոֆը շոկային կանխատեսում է արել առ այն, որ Լիբանանը, որտեղից գործում է Իսրայելի դեմ պայքարող «Հեզբոլլահ» շիական շարժումը, և Սիրիան, որտեղ իսլամիստ առաջնորդը տապալել է Բաշար ալ Ասադի կառավարությունը, շուտով կարող են միանալ Իսրայելի հետ Աբրահամի համաձայնագրերին: Որպես հավանական գործընկեր նա նշել է նաև Լիբիան, Հայաստանը և Ադրբեջանը։
«Իմ կանխատեսումն այն է, որ համեմատաբար շուտով մենք կտեսնենք Լիբանանի և նույնիսկ Սիրիայի պարագայում կարգավորման ներուժը: Նրանց կողմից ուժեղ դրական արձագանքներ են եղել: Նույնը կարող է տեղի ունենալ Լիբիայի հետ: Աբրահամի խաղաղության համաձայնագրերին միանալը կարող է տեղի ունենալ Ադրբեջանի և Հայաստանի հետ: Մենք կարծում ենք, որ շատ, շատ մոտ ենք այդ երկրներում հակամարտության կարգավորմանը, վերջնական կարգավորմանը: Երկուսն էլ, կարծում եմ, կարող են պատրաստ լինել միանալ Աբրահամի խաղաղության համաձայնագրերին: Այսպիսով, դա մեծ նախաձեռնություն է նախագահի կողմից: Նա հավատում է դրան: Այն նպաստում է ընդհանուր առմամբ տարածաշրջանում խաղաղությանն ու կայունությանը: Մենք շատ լավ թիմ ունենք… Ես իսկապես վստահ եմ, որ առաջիկա մի քանի ամիսների ընթացքում կունենանք չորս կամ հինգ, գուցե վեց երկրներ, որոնք կկնքեն Աբրահամի խաղաղության համաձայնագրերը, և դա մեծ ազդանշան կլինի աշխարհին նախագահ Թրամփի արտաքին քաղաքական նախաձեռնությունների մասին՝ աշխարհում խաղաղություն և կայունություն խթանելու համար», — եզրափակել է նա:
