ՌԴ Պետդումայի նախագահ Վյաչեսլավ Վոլոդինը քննադատել է Հայաստանի իշխանությունների վերջին քայլերը՝ դրանք համեմատելով Ուկրաինայում տարիներ առաջ տեղի ունեցած գործընթացների հետ։ Նրա խոսքով՝ Երևանում անցկացված գագաթնաժողովից և հնչած հայտարարություններից հետո հայ-ռուսական հարաբերություններում կարող է աճել լարվածությունը։
«Այսօր բոլորի համար ակնհայտ է դարձել հարցը՝ ինչպե՞ս են զարգանալու հարաբերությունները Փաշինյանի նման արարքներից հետո։ Մեր պետություններն ավելի մոտ կլինե՞ն, թե՞ հեռու։ Լարվածությունը հարաբերություններում ավելի քիչ կլինի՞, թե՞ շատ։ Ամենայն հավանականությամբ՝ երկրորդը։ Ակամա զուգահեռ է առաջանում. հենց այսպես էր ամեն ինչ սկսվում Ուկրաինայում։ Արդյո՞ք դա պետք է Հայաստանի շարքային քաղաքացիներին»,- գրել է Վոլոդինը։
Վոլոդինը նշել է, որ Ռուսաստանը հայ ժողովրդի հետ ունի առանձնահատուկ հարաբերություններ, ընդգծելով ՌԴ-ում բնակվող մեծաթիվ հայ համայնքի դերը։ Նա նաև շեշտել է, որ խոսքը ոչ թե Հայաստանի ինքնիշխանության, այլ «բարոյականության և պարկեշտության» մասին է։
«Կանխատեսում եմ, որ կսկսվեն այսպիսի հայտարարություններ՝ «Մենք ինքնիշխան պետություն ենք, ինչ ուզում ենք, անում ենք»։ Ոչ ոք չի խոսում ինքնիշխանության և միջամտության մասին։ Խոսքը բարոյականության և պարկեշտության մասին է։ Դրանք կա՛մ կան, կա՛մ չկան։ Կարելի է բարձր պաշտոններ զբաղեցնել, բայց դա չի նշանակում, որ մարդն օժտված է այդ որակներով»,- հավելել է Պետդումայի նախագահը։
Պետդումայի նախագահը հավելել է, որ Մոսկվան շարունակում է հարաբերությունները կառուցել բարեկամության, փոխշահավետ համագործակցության և չմիջամտելու սկզբունքներով։
Հայաստանում տեղի ունեցող գործընթացները հիշեցնում են Ուկրաինայի սցենարը. ՌԴ Պետդումայի նախագահ
