Անդամակցությունը ԵԱՏՄ-ին Հայաստանի և մյուս անդամների համար ապահովում է լուրջ տնտեսական առավելություններ, այդ մասին հայտարարում է նաև Երևանը՝ նշել է ՌԴ ԱԳ նախարար Մարիա Զախարովան ամենշաբաթյա ճեպազրույցի ժամանակ:
Նրա խոսքով՝ այդ թեման քննարկվել է նաև ՀՀ ԱԳ նախարար Արարատ Միրզոյանի՝ հունվարի 21-ին Մոսկվա կատարած այցի ընթացքում: Զախարովան ընդգծել է, որ 2015 թվականից սկսած Հայաստանի արտահանումը ԵԱՏՄ երկրներ ավելացել է ավելի քան 10 անգամ: Նա նշել է, որ Ռուսաստանի հետ առևտուրն էլ 2024 թվականին նախնական տվյալներով՝ հասել է 12 մլրդ դոլարի: ՌԴ ԱԳՆ խոսնակի խոսքով՝ դրանք «արդար ճանապարհով ստացված եկամուտներ են», այլ ոչ թե օգնություն:
«Ինչ վերաբերում է Եվրամիությանն անդամակցության կուրսին, նշեմ, որ այդ դեպքում այդ բոլոր առավելությունները կկորեն: Եթե դուք չեք հանդիսանում այդ միավորման անդամ, ձեզ հասանելի չեն համապատասխան առավելությունները»,- ասել է Զախարովան:
Նրա խոսքով՝ դա Հայաստանի ինքնիշխան իրավունքն է. Ռուսաստանը միայն անկեղծ ներկայացնում է իրավիճակը: Զախարովան նշել է, որ անգամ միջնաժամկետ հեռանկարում Երևանը չի կարող փոխարինել ԵԱՏՄ երկրների հետ առևտուրը այլընտրանքներով:
