Ինչպես հայտնի է հունիսի 7-ին տեղի է ունենալու ԱԺ ընտրություններ։ Ընտրություններին մասնակցելու իրավունք ունի 2․489․031 ՀՀ քաղաքացի։
2021թ-ի ԱԺ արտահերթ ընտրություններին Հայաստանում ընտրելու իրավունք ունեցող 2 593 572 քաղաքացիներից արտահերթ ընտրություններին մասնակցել էր 1 281 174–ը կամ 49.4 տոկոսը։
Համապետական ընտրություններին մարդկաց մասնակցության ցածր ցուցանիշը պայմանավորված է նաև այն հանգամանքով, որ մարդիկ իրենց գրանցման հասցեում չեն բնակվում և անձնական պատճառներով պայմանավորված չեն կարող ընտրության օրը մասնակցել ընտրություններին։
«Հրապարակ»-ը ՀՀ Ներքին գործերի նախարարության միգրացիայի և քաղաքացիության ծառայությունից հետաքրքրվել է, թե ինչ ընթացակարգով կարող են առանց գրանցման հասցեն փոխելու ՀՀ քաղաքացիություն ունեցող անձինք իրենց նախընտրած ընտրատեղամասում իրացնել ընտրական իրավունքը։
«Հրապարակ»-ի հարցին ի պատասխան հայտնեցին․ «Այն անձինք, ովքեր ցանկանում են այլ ընտրատեղամասում քվեարկել, պետք է մինչև մայիսի 26-ը ներկայանան իրենց ցանկալի ընտրատեղամասը սպասարկող Անձնագրային և վիզաների վարչություն, որպեսզի ժամանակավոր գրանցում ստանան։ Այս գործընթացի համար անհրաժեշտ է միայն անձը հաստատող փաստաթուղթ, իսկ ժամանակավոր գրանցման դեպքում անձնագիր փոխելու կամ անձնագրում հավելյալ նշումներ անելու անհրաժեշտություն չկա»։
