Իրանի և Հայաստանի միջև ուղիղ սահմանային կապը մի քանի հազար տարվա պատմություն ունի, և բոլոր երկրները, այդ թվում՝ Ռուսաստանի կառավարությունը, պետք է հարգեն դա. այս մասին հայտարարել է Իրանի խորհրդարանի Ազգային անվտանգության հանձնաժողովի անդամ Հասան Քաշքավին՝ Mehr գործակալության հետ զրույցում անդրադառնալով Սյունիքի մարզով այսպես կոչված «Զանգեզուրի միջանցքի» բացմանը և այդ առումով Ադրբեջանի և Թուրքիայի հետ համագործակցելու վերաբերյալ ռուս պաշտոնյաների հայտարարություններին:
Այս համատեքստում նա հիշեցրել է, որ Իսլամական հեղափոխության գերագույն առաջնորդն ընդգծել էր, որ սահմանները երբեք չպետք է փոխվեն, չպետք է լինի նվազագույն հարձակում տարածաշրջանի պատմական ու ավելի քան հազարամյա սահմանների վրա։
Քաշքավին ընդգծել է, որ տարածաշրջանում անվտանգությունն ու խաղաղությունը պահանջում են կայունություն և ոչ մի փոփոխություն սահմաններում։
«Հայաստանի միջև ուղիղ սահմանային կապը մի քանի հազար տարվա պատմություն ունի, և բոլոր երկրները, այդ թվում՝ Ռուսաստանի կառավարությունը, պետք է հարգեն դա: Մենք բոլորս պետք է ուշադրություն դարձնենք երկրների տարածքային ամբողջականության պահպանմանը և միջազգային սահմանների ճանաչմանը… Ելնելով դրանից՝ մեզ համար շատ զարմանալի է Ռուսաստանի նման երկրի դիրքորոշումը երեք կղզիների քննարկման կամ «Զանգեզուրի միջանցքի» մասին արված պնդումը։ Ամեն դեպքում, մենք հույս ունենք, որ Ռուսաստանը, Ադրբեջանը, Թուրքիան, Հայաստանը և բոլոր երկրները կփորձեն արդյունավետ գործողություններ ձեռնարկել տարածքային ամբողջականության և անկախության հարգման և միջազգային սահմանների ճանաչման շրջանակում», — ասել է նա:
