ՄԱԿ-ի գլխավոր քարտուղար Անտոնիո Գուտերեշը հայտարարել է, որ Մերձավոր Արևելքում ռազմական հակամարտությունը դուրս է եկել վերահսկողությունից։ Նրա խոսքով՝ պատերազմն աշխարհին կանգնեցրել է ռազմական գործողությունների ընդլայնման, խաղաղ բնակչության շրջանում զոհերի թվի աճի եւ համաշխարհային տնտեսական ճգնաժամի սպառնալիքի առջեւ, հաղորդում Է Reuters-ը:
Հակամարտությունը գերազանցել է այն, ինչ առաջնորդները համարում էին անհավանական։ Այն չափազանց հեռու է գնացել։ Ժամանակն է դադարեցնել սրման աստիճաններով բարձրանալը և սկսել բարձրանալ դիվանագիտական աստիճաններով՝ վերադառնալով միջազգային իրավունքի լիակատար հարգանքին, ասել է Գուտերեշը։
ՄԱԿ-ի գլխավոր քարտուղարը առանձին ուղերձներ է հղել հակամարտության հիմնական կողմերին։ Նա կոչ է արել Միացյալ Նահանգներին և Իսրայելին անհապաղ դադարեցնել ռազմական գործողությունները, իսկ Իրանին՝ դադարեցնել հարևան պետությունների վրա հարձակումները, որոնք հակամարտության կողմեր չեն։ Նա նաև պահանջել է դադարեցնել Լիբանանի տարածքում հարվածները։
Գուտերեշը ընդգծել է, որ Հորմուզի նեղուցի փակումը խաթարում է նավթի, գազի և պարարտանյութերի մատակարարումները համաշխարհային ցանքի սեզոնի կարևորագույն ժամանակահատվածում։ Նա նշել է, որ պատերազմի հետևանքներից ամենաշատը տուժում են բնակչության ամենաաղքատ և ամենախոցելի խմբերը։
