Իրանի Իսլամական հեղափոխության պահապանների կորպուսի (ԻՀՊԿ, զինված ուժերի էլիտար ստորաբաժանումներ) ավիատիեզերական ուժերը երկուշաբթի առավոտյան Իսրայելի վրա հարձակման ժամանակ օգտագործել են հիպերձայնային հրթիռներ, հաղորդում է ՌԻԱ «Նովոստի»-ն՝ իրանական Tasnim պետական լրատվական գործակալությանը հղումով։
«Իրանի կողմից այսօր առավոտյան Իսրայելի վրա իրականացված հրթիռային հարձակումը նախորդներից տարբերվում էր հիպերձայնային հրթիռների ավելի ակտիվ օգտագործմամբ։ Ինչպես երևում է լրատվամիջոցներում հրապարակված կադրերից, կարելի է հասկանալ, որ ԻՀՊԿ-ի ավիատիեզերական ուժերը հաշվի են առել երկու կարևոր հարց՝ հրթիռների կործանարար ուժի և արագության մեծացումը։ Այսօրվա գործողության ընթացքում մի քանի լուսանկարներ են ստացվել, որոնցում երևում են Թել Ավիվում և Հայֆայում թիրախներին հարվածող հիպերձայնային հրթիռները, ինչը ցույց է տալիս, որ այդ հրթիռները հեշտությամբ անցել են Իսրայելի հակահրթիռային պաշտպանության համակարգերի միջով և հարվածել դրանց թիրախներին», — ասվում է հայտարարության մեջ։
Tasnim-ը ընդգծում է, որ ԻՀՊԿ-ի ավիատիեզերական ուժերը, հավանաբար, ավելի հաճախ և ավելի մեծ քանակությամբ կսկսեն օգտագործել հիպերձայնային հրթիռներ Իսրայելի վրա հարձակումների ժամանակ: Գործակալությունը կարծում է, որ նման հարձակումները «Իսրայելին դժվարին դրության մեջ կդնեն պատերազմը շարունակելու համար»:
