Եվրոպական միության արտաքին գործերի և անվտանգության քաղաքականության հարցերով բարձր ներկայացուցիչ Կայա Կալլասը կոչ է արել Եվրոպային չտրվել Ռուսաստանի անվտանգության մտահոգությունների վերաբերյալ Մոսկվայի ներկայացրած դիրքորոշումներին։ Հայտարարությունը հնչել է Ռուսաստանի, ԱՄՆ-ի և Ուկրաինայի միջև Աբու Դաբիում ընթացող եռակողմ բանակցությունների ֆոնին։
«Անկախ նրանից, թե ինչպես կզարգանան խաղաղության բանակցությունները, Եվրոպան կշարունակի աջակցել Ուկրաինային։ Մենք չպետք է տրվենք Ռուսաստանի՝ իր անվտանգության մտահոգությունների վերաբերյալ ներկայացրած պատմություններին»,- գրել է Կալլասը X սոցիալական ցանցում։
Նա ՆԱՏՕ-ն բնութագրել է որպես պաշտպանական դաշինք՝ պնդելով, որ այն երբեք չի սպառնացել Ռուսաստանին։ Կալլասը նաև հայտարարել է, որ Մոսկվայի նկատմամբ սահմանված պատժամիջոցները կխստացվեն։
Ավելի վաղ ԱՄՆ նախագահի փեսան և հատուկ բանագնաց Ջարեդ Քուշները Բրյուսելում անցկացված խորհրդակցություններից հետո հայտնել էր, որ Վաշինգտոնը մտադիր է Մոսկվային ներգրավել Եվրոպայում անվտանգության նոր ճարտարապետության ձևավորման շուրջ բանակցություններում՝ Ուկրաինայի հակամարտության կարգավորման գործընթացի շրջանակում։
Մինչդեռ Ռուսաստանի արտաքին գործերի նախարարությունում հայտարարել են, որ չեն տեսնում ՆԱՏՕ-ի և Եվրամիության պատրաստակամությունը՝ համատեղ անվտանգության համակարգ կառուցելու, այլ ոչ թե այն Ռուսաստանի դեմ ուղղելու հարցում։
Նշենք, որ Ռուսաստանի, ԱՄՆ-ի և Ուկրաինայի միջև եռակողմ բանակցությունները տեղի են ունենում Աբու Դաբիում՝ նոյեմբերի 10-11-ին։
