Ուկրաինական «Общественное» հեռուստաալիքը հայտնել է, որ շաբաթ օրը Կիևում վեց մարդու վրա կրակ բացած և ձերբակալության ժամանակ սպանված տղամարդը հրկիզել է իր բնակարանը, ապա փողոցում կրակ բացել և սուպերմարկետում մարդկանց պատանդ վերցնել։
«Դուրս գալուց և կրակ բացելուց առաջ հրդեհ է բռնկվել նրա բնակարանում՝ բարձրահարկ շենքի հինգերորդ հարկում։ Կիևի քաղաքային պետական վարչության (ԿՔՊՎ) տվյալներով՝ տղամարդն ինքն է հրկիզել բնակարանը», — նշված է հեռուստաալիքի կայքում։
Հեռուստաալիքը հրապարակել է այրված բնակարանի լուսանկարներ։ Հեռուստաալիքի տվյալներով՝ հարևանը նախկինում այցելել է նրա բնակարան և տեսել զենքեր, ատրճանակ և տասնյակ փամփուշտներ, իսկ տղամարդն ինքը սպառնացել է, որ ոչ մեկից չի վախենում և կարող է սպանել ցանկացած մեկին։
Ըստ ուկրաինական լրատվամիջոցների՝ տղամարդուն նախկինում մեղադրանք է առաջադրվել թեթև մարմնական վնասվածքների համար։ Կիրակի օրը ուկրաինական «Strana.ua» լրատվամիջոցը հայտնել է, որ հարձակվողի անունը Դմիտրո Վասիլչենկով է։ Հրատարակության տվյալներով՝ նա նախկին զինվորական է եղել։
