Tribune.am-ը ՀՀ առաջին նախագահ, ՀԱԿ առաջնորդ Լեւոն Տեր-Պետրոսյանին հարցում արեց՝ ինչո՞ւ Սերժ Սարգսյանի իշխանության ժամանակ կոշտ գնահատական տվեց ՀՀԿ–ին ու ՀՅԴ–ին, որոնք պարտադրում էին իրենց պատգամավորներ Գրիգոր Ավալյանին, Ֆելիքս Ցոլակյանին, Աղվան Վարդանյանին մանդատը վայր դնել, իսկ Փաշինյանին ինչ–ինչ պատճառներով խնայում է։
Հիշեցնենք, որ 2018–ին պարտադրեցին «Գրանդ Քենդիի» նախկին ֆինանսիստ, Վարդանյանների «քվոտայով» պատգամավոր դարձած Գրիգոր Ավալյանին քվեարկել Փաշինյանին կողմ, երբ չցանկացավ դա անել, պարտադրված մանդատը վայր դրեց։ ՀՀԿ խմբակցության անդամ Ֆելիքս Ցոլակյանը, որը մայիսի 1-ին և 8-ին կողմ էր քվեարկել Նիկոլ Փաշինյանի թեկնածությանը, նույնպես ստիպված խմբակցությունից դուրս գալու դիմում էր գրել ու մանդատը վայր դրել։ Իսկ ՀՅԴ–ն պարտադրել էր Փաշինյանի օգտին չքվեարկող Աղվան Վարդանյանին լքել կուսակցությունը, խմբակցությունը ու նա նույնպես մանդատը վայր էր դրել։
Այդ ժամանակ Լեւոն Տեր–Պետրոսյանը հակասահմանադրական էր որակել ՀՀԿ–ի ու ՀՅԴ–ի քայլը եւ հորդորել ԱԺ նախագահին՝ Արա Բաբլոյանին մանդատից հրաժարվող պատգամավորների դիմումները չընդունել, վերադարձնել։ Նա մասնավորապես հայտարարել էր․ «ՀՀ Սահմանադրության 94-րդ հոդվածում ամրագրված է՝ պատգամավորը ներկայացնում է ամբողջ ժողովրդին, կաշկանդված չէ հրամայական մանդատով, առաջնորդվում է իր խղճով և համոզմունքներով։ Հետևաբար մանդատից հրաժարվելու ներկայացվող պահանջը հակասահմանադրական է»։ Առաջին նախագահը միջազգային հանրության դիրքորոշումն էր ներկայացրել, որ իշխանության ձևավորման գործընթացում ամենակարևորը սահմանադրության և օրենքի տառին դրա համապատասխանության փաստն է, դա բխում է, թե՛ իշխանության, թե՛ ընդդիմության, և թե՛ Հայաստանի շահերից․ «Այլ կերպ ձևավորված իշխանության օրինակարգությունը (լեգիտիմությունը) չի ճանաչվի ո՛չ ժողովրդի, ո՛չ էլ միջազգային հանրության կողմից»։
Տեր-Պետրոսյանի դիտարկմանն ի պատասխան՝ Արմեն Ռուստամյանն ասել էր․ «Այո՛, պատգամավորն իրավունք ունի առաջնորդվել իր խղճով և համոզմունքով, բայց սա Դաշնակցությունն է: Մենք ունենք մեր ավանդույթը, հակասահմանադրական որոշում չենք կայացնում, պատգամավորն ինքը հրաժարվում է: Սա Դաշնակցությունն է, որի հետ ոչ ոք չի կարող խաղ տալ: Այս կուսակցությունից այնքան մեծեր են հեռացվել»։ Աղվան Վարդանյանը, նույնպես արձագանքելով առաջին նախագահին, ասել էր․ «Լեւոն Տեր-Պետրոսյանի հիշեցրածը գիտեմ: Բայց ես ինքս եմ ելույթում հայտարարել, որ պատրաստ եմ վայր դնել մանդատս, ինչը եւ հաջողությամբ արել եմ: Ավելին՝ գիտեմ նաեւ, որ կարող եմ չվերահաստատել ԱԺ նախագահին գրած դիմումս ու մնալ պատգամավոր: Բայց, բնականաբար, այդպես չեմ վարվի: Սահմանադրականից զատ՝ կա խնդրի բարոյական կողմը: Այո, Տեր-Պետրոսյանը ճիշտ է: Բայց ես ավելի ճիշտ եմ»։
Հիմա՝ մեր օրերում վարչապետ Փաշինյանը հրապարակավ հայտարարում է՝ ես եմ խնդրել ԲԴԽ նախագահ Կարեն Անդրեասյանին, ՔԿ նախագահ Արգիշտի Քյարամյանին, ՆԳ նախարար Վահե Ղազարյանին, Հակակոռուպցիոն կոմիտեի նախագահ Սասուն Խաչատրյանին հրաժարական տալ, ես եմ խնդրել ՔՊ պատգամավորներ Նարեկ Զեյնալյանին, Հովիկ Աղազարյանին մանդատը վայր դնել։
ՔՊ–ն, ավելի ճիշտ մեկ անձ՝ Փաշինյանը, արեց այն, ինչ արել էին ՀՀԿ–ն ու ՀՅԴ–ն, ուստի Tribune.am-ը խնդրեց առաջին նախագահին պարզաբանել՝ ինչո՞ւ է հիմա լուռ։
Առաջին նախագահի մամուլի խոսնակ Արման Մուսինյանը մեզ փոխանցեց Լեւոն Տեր–Պետրոսյանի պարզաբանումը․ «Պատգամավորին պարտադրել մանդատը վայր դնել ինչպես այն ժամանակ էր հակասահմանադրական, այնպես էլ հիմա։ Պատգամավորը կաշկանդված է բացարձակապես իր խղճով եւ համոզմունքներով։ Այնպես որ, ստիպողաբար մանդատը վայր դնելը, կրկնում ենք, ինչպես այն ժամանակ էր հակասահմանադրական, այնպես էլ հիմա»։
Հեղինակ՝ Հռիփսիմե Ջեբեջյան
