Վարչապետ Նիկոլ Փաշինյանն այսօր ԱԺ ամբիոնից հիշեց 2 տարի առաջ արած իր հայտարարությունը, երբ ասել էր՝ «եթե մեզ հաջողվի 1-2 տարի պահել մեր պետականությունը՝ նշանակում է, որ առաջիկա հարյուրամյակում պետություն ունենալու իրական հնարավորություն ենք ստեղծել ու ստեղծում»։
«Ահա, երկու տարի անց ես կանգնած եմ ՀՀ խորհրդարանի ամբիոնին՝ որպես ՀՀ վարչապետ ու պետք է այսպիսով արձանագրեմ, որ միջնաժամկետում մեր դարավոր ու ռազմավարական խնդիրը լուծված է, բայց չի կարելի ոչ մի վայրկյան թուլացնել զգոնությունը, որովհետև, այո, այն մարտահրավերները, որոնք ունեինք երկու տարի առաջ, դրանց մի մասը դարձել են էականորեն ավեի կառավարելի, բայց նաև ի հայտ են եկել նոր մարտահրավերներ, որոնք որոշակիորեն կառավարելու համար անհրաժեշտ է, որ հաղթահարենք ազգ-նահատակ ու ազգ-բանակ բանաձևերը և ավելի ու ավելի ամուր կանգնենք պարզապես պետություն, ուղղակի պետություն, որի միակ խնդիրը սեփական տարածքում սեփական քաղաքացիների անվտանգությունն ու բարեկեցությունն ապահովելն է։ Մեզ պետք է ամուր կանգնել այս հայեցակարգի հիման վրա ու քայլ առ քայլ, զգուշորեն կարողանալ հաղթահարել ականապատ դաշտն ու միջավայրն ու հասնել այն հանգրվանին, որը հնարավորություն կտա ասելու՝ ահա, երաշխավորեցինք մեր պետության լինելությունն առաջիկա հարյուրամյակի ընթացքում»,- հայտարարեց Նիկոլ Փաշինյանը։
Նա նշեց, թե ինքը համոզված է, որ հենց իրենք են այն կառավարությունը, հենց իրենք են այն խորհրդարանը, հենց իրենք են այն ժամանակը, որը հնարավորություն է ունենալու ասելու՝ «ահա, մենք երաշխավորեցինք Հայաստանի պետականության գոյությունը առաջիկա հարյուրամյակի ընթացքում»։