Գյումրեցիներն իրենց քվեով հաստատեցին, որ եկել է պատմական պահը, որ հենց Գյումրիում պետք է իշխանազրկել իշխող ուժին. այս մասին հրավիրված ասուլիսին ասաց Գյումրու «Մայր Հայաստան» դաշինքի քաղաքապետի թեկնածու Կարեն Սիմոնյանը:
«Մենք առաջինն ենք հայտարարել, որ մեզ համար ամենակարևորը ՔՊ-ն իշխանազրկելն է, և մենք մեր քվեն տալիս ենք հանուն իշխանափոխության, մենք չունենք որևէ քաղաքական ուժի հետ միավորվելու խնդիր, մեզ ոչ մի պաշտոն պետք չէ: Մենք չենք եկել ընտրություններին մասնակցենք, որ մանդատ ստանալուց հետո սակարկենք դա որևէ քաղաքական ուժի հետ: Մեր միակ խնդիրն իշխանազրկելն է ՔՊ-ին, և մենք մեր քվեն տալիս ենք հանուն դրա»,- ասաց նա:
Սիմոնյանը վստահեցրեց՝ կուլիսային պայմանավորվածությունների էլ չեն գնալու:
Անդրադառնալով Մարտուն Գրիգորյանի լռությանը՝ նա ասաց, որ իր կարծիքով՝ կլինի հայտարարություն, դրանից հետո կարձագանքեն:
Հարցին՝ արդյոք խոսել է Մարտուն Գրիգորյանի հետ, նա պատասխանեց. «Ես միջնորդավորված եմ խոսել, հստակ ինֆորմացիա չունեմ, սպասում ենք հայտարարության: Եթե չի ստացվելու միավորումը, մենք փորձելու ենք դառնալ այն ուժը, որը աջակցելու է միավորմանը և իր կոչերով հանդես է գալու, որ բաց չթողնենք պատմական շանսը»:
Սիմոնյանը հավելեց, որ եթե իրենց պաշտոններ առաջարկեն, հրաժարվելու են, ուղղակի մանդատներով քվեարկություն ենք տալիս, որ ՔՊ-ն Գյումրի քաղաքում չունենա իշխանություն:
