Ռուսաստանի արտաքին գործերի նախարարության մամուլի խոսնակ Մարիա Զախարովան հայտարարել է, որ Մոսկվան Բաքվին դիվանագիտական խողովակներով կպատասխանի Ադրբեջանի կոչին՝ չօգտագործել Ղարաբաղի հարցը քաղաքական քննարկումներում։
Ավելի վաղ Ադրբեջանի արտաքին գործերի նախարարությունը նշել էր, որ Ռուսաստանի նախագահ Վլադիմիր Պուտինի և Հայաստանի վարչապետ Նիկոլ Փաշինյանի միջև Մոսկվայում կայացած հանդիպման ժամանակ և դրանից հետո «ռուս պաշտոնյաները հրապարակային քննարկումներում անդրադարձել են բացառապես Ադրբեջանի ներքին գործերին վերաբերող հարցերին»։ Այնուհետև Բաքուն դիվանագիտական խողովակներով ռուսական կողմին տեղեկացրել է «Ադրբեջանի Ղարաբաղի տարածաշրջանը քաղաքական շահարկումներում օգտագործելու անթույլատրելիության մասին»։
«Բաքվի մտահոգությունների պատասխանը ադրբեջանական կողմին կփոխանցվի դիվանագիտական խողովակներով։ Հիշեցնեմ, որ Ռուսաստանը և անձամբ Ռուսաստանի նախագահ Վլադիմիր Պուտինը կարևոր դեր են խաղացել Լեռնային Ղարաբաղի հակամարտության կարգավորման գործում։ Մենք մշտապես ձգտել ենք ստեղծել անհրաժեշտ պայմաններ Բաքվի և Երևանի միջև հարաբերություններում այս ամենազգայուն և բարդ հարցը լուծելու համար։ Մենք դա անում ենք 1990-ական թվականներից ի վեր», — չորեքշաբթի օրը ճեպազրույցի ժամանակ ասել է նա։
Խորհրդային Միության փլուզումից և 1992-1994 թվականներին Ադրբեջանի հետ զինված հակամարտությունից հետո ղարաբաղը երկար տարիներ գոյություն է ունեցել որպես չճանաչված հանրապետություն, որը բնակեցված է հայերով։ 2020 թվականի սեպտեմբերին տարածաշրջանում վերսկսվեցին մարտական գործողությունները։ Մոսկվայի միջնորդությամբ կողմերը նույն թվականի նոյեմբերի 10-ի գիշերը համաձայնության եկան հրադադարի շուրջ։ Հայկական կողմը կորցրեց Ղարաբաղը շրջապատող բոլոր շրջանները և մի քանի այլ տարածքներ։ Տարածաշրջանում տեղակայվեցին ռուս խաղաղապահներ։
