Նարեկ Կարապետյանը անդրադարձել է ադրբեջանական աղբյուրում ներկայացված Զանգեզուրի իրադարձություններին

«Մեր ձևով» շարժման համակարգող Նարեկ Կարապետյանը գրառմամբ անդրադարձել է մի գրքի, որի հեղինակը Ադրբեջանի ներքին գործերի նախարարներից մեկի՝ Հեյդարովի հայրն է։

Գրքում ներկայացվում են Զանգեզուրում տեղի ունեցած իրադարձությունները՝ ադրբեջանական տեսանկյունից, որտեղ հայերը նկարագրվում են որպես ազգայնական և դաժան։ Միևնույն ժամանակ, Կարապետյանը նշել է, որ գիրքը կարևոր նշանակություն ունի իր ընտանիքի համար, քանի որ այնտեղ հիշատակվում է իր նախնին՝ Հայրապետ Մարությանը, ով եղել է Գարեգին Նժդեհի պայքարի համախոհը և խորհրդային շրջանում ենթարկվել է ռեպրեսիաների։

«Այս գիրքը գրել է Ադրբեջանի ներքին գործերի նախարարներից մեկի՝ Հեյդարովի հայրը։ Գրքում պատմվում է, թե ինչպես են ադրբեջանցիները փորձում գրավել Զանգեզուրը, և ինչպես է տեղի հայ ժողովուրդը վռնդում նրանց իր հողից։ Իհարկե, հայերին ներկայացնում են որպես ազգայնական, դաժան ու վրիժառու մարդիկ։ Սակայն, այս գիրքը իմ ընտանիքի պատմության մեջ կարևոր դեր ունի։

Գրքում գրվում է Հայրապետ Մարությանի մասին, որն իր գյուղում՝ Սյունիքի Տեղ գյուղում, դիմավորել է Գարեգին Նժդեհին և եղել նրա պայքարի ընկերը։ Հեղինակի խոսքով՝ նա «հայ ազգայնական» էր։ Հայրապետ Մարությանը մայրիկիս պապիկն է, ում չեն տեսել ո՛չ մայրս, ո՛չ տատս։

Սովետական շրջանում նրան ենթարկել են ռեպրեսիաների՝ Նժդեհի պայքարի մասնակից լինելու համար։ Տատս՝ Հասմիկը, չի հիշում իր հորը և մեծացել է առանց հոր՝ եղբայրների խնամքի տակ։ Մի քանի օրից Նժդեհի ծննդյան օրն է, և երբ լսում եմ այս երգը, ինչ-որ շատ անձնական բան է հիշեցնում՝ իմ պատմությունը։ Արազ ափին, ծնված ընկեր, Էն Արազին մենք մատաղ, Մութ բանտերում, տանջված ընկեր, Սուրբ տանջանքիդ մենք մատաղ»։