ԱՄՆ նախագահ Դոնալդ Թրամփն Իսրայելի վարչապետ Բենիամին Նեթանյահուին փետրվարի 4-ին հրավիրել է Վաշինգտոն: Նա կլինի առաջին օտարերկրյա ղեկավարը, որը կայցելի Սպիտակ տուն, գրում է The Guardian-ը՝ նշելով, որ այդ քայլը մեծ զիջում է ԱՄՆ դաշնակցին, որը Միջազգային քրեական դատարանի կողմից հետախուզվում է ռազմական հանցագործությունների մեղադրանքով:
Ըստ պարբերականի՝ կողմերը քննարկելու են խաղաղության հաստատման հնարավորություններն Իսրայելում և հարևան տարածքներում, ինչպես նաև «ընդհանուր հակառակորդներին հակազդելու ջանքերը»:
Թրամփը հայտարարել է, թե «վստահ չէ», որ Գազայում հրադադարը կպահպանվի։ Հրադադարի պայմանների համաձայն՝ Իսրայելը և ՀԱՄԱՍ-ը շուտով պետք է սկսեն բանակցությունները երկարաժամկետ խաղաղության շուրջ, և շատերը վախենում են, որ այն կտապալվի և կհանգեցնի արյունահեղության վերսկսմանը ավելի քան 15 ամիս տևած մարտերից հետո:
The Guardian-ը գրում է, որ Թրամփի ու Նեթանյահուի անձնական հարաբերություններն այդքան էլ հարթ չեն, սակայն Իսրայելը շարունակում է մնալ ԱՄՆ-ի ամենամոտ դաշնակիցը տարածաշրջանում։ Նշվում է, որ Թրամփի երդմնակալության արարողությունից մեկ օր առաջ Մերձավոր Արևելքում նախագահի ներկայացուցիչ Սթիվ Ուիթկոֆը լարված զրույց է ունեցել Նեթանյահուի հետ՝ ՀԱՄԱՍ-ի և Իսրայելի միջև «Հրադադար՝ պատանդների դիմաց» համաձայնագրի շուրջ բանակցությունների հարցով:
Այդ ժամանակից ի վեր Թրամփը հանել է Իսրայելին մոտ հազար կիլոգրամանոց ռումբեր մատակարարելու արգելքը, որը Բայդենի վարչակազմը կիրառել էր՝ ի պատասխան Գազայի դեմ Իսրայելի կողմից ուժի կիրառման:
