Ներքին գործերի նախարար Արփինե Սարգսյանն անդրադարձել է Փարաքարի դեպքի առնչությամբ դատական նիստում հնչած՝ նախկին փոխոստիկանապետ Վարդան Վարդանյանի վերաբերյալ մեղադրանքներին՝ դրանք իրականության հետ որևէ աղերս չունեցող հայտարարություն որակելով։
Նախարարի խոսքով՝ դեպքի ժամանակ ինքն անձամբ գտնվել է Վաղարշապատի ոստիկանության բաժնում, սկզբից մինչև վերջ տեղյակ է եղել գործընթացին և գիտի, թե վարույթն իրականացնող մարմինն ինչ ապացույցներ է ձեռք բերել և իրավաչափ եղանակով ամրագրել։
Սարգսյանը դատարանում հնչած հայտարարությունն անհեթեթ է համարել՝ նշելով, որ ժամանակը ցույց կտա, թե ինչ ավարտ կունենա դատական վարույթը։
Հիշեցնենք՝ երեկ կայացած դատական նիստում մեղադրյալ Գևորգ Հարությունյանը հայտարարել էր, որ ինքը չի սպանել Փարաքարի համայնքապետ Վալոդյա Գրիգորյանին, իսկ ինքնախոստովանական ցուցմունքը տվել է նախկին փոխոստիկանապետ Վարդան Վարդանյանի՝ իր ընտանիքին ուղղված սպառնալիքների ազդեցության տակ։
Վալոդյա Գրիգորյանը սպանվել է 2025 թվականի սեպտեմբերի 23-ին։
