Իմաստուն խոսք կա՝ մեծ մարդիկ չարիք չեն բերում, մեծ մարդիկ բարիք են ստեղծում, բարիք են բերում, իսկ չարիք բերում են ոչնչությունները, խորհրդարանական ճեպազրույցների ընթացքում հայտարարեց «Հայաստան» խմբակցության անդամ Աղվան Վարդանյանը՝ անդրադառնալով բարերար Սամվել Կարապետյանի շուրջ ծավալվող իրադարձություններին։
«Սամվել Կարապետյանի գործը, կյանքը բոլորիդ աչքի առաջ է։ Միայն ստեղծել է, բարիք է գործել Հայաստանում և Արցախում իր միջազգային հեղինակությամբ։ Եվ այն աջակցությունը, որ նա բերել է ոչ միայն հսկայական ներդրումներով, այլև պարզ, հասարակ մարդկանց համար կատարած աշխատանքով, վկայությունն է իր մեծության։ Դուք ինքներդ որոշեք՝ ոնչնչությունն ով է և ոչնչություններն ովքեր են»,-ասաց Վարդանյանը։
Նա նշեց, թե Նիկոլ Փաշինյանի վերջին շրջանի քայլերը հաճախ են հիշեցնում Վրաստանի նախկին նախագահ Սաակաշվիլու քայլերը։
«Նա էլ իր վախճանը գտավ վրացական եկեղեցու դեմ պայքար սկսելով, վրաց ժողովուրդը շատ կտրուկ ու միասնաբար հակադարձեց դրան։ Նմանությունները և զարգացումները շատ են համընկնում։ Եվ վախճանն էլ, կարծում եմ, այդպես է լինելու»,-ասաց Աղվան Վարդանյանը։
Պատգամավորը վստահեցրեց՝ Սամվել Կարապետյանն ուժեղ, կամային մարդ է, և այս ապօրինությունն իշխանությունը չի մարսելու։
