Գործարար, բարերար, «Ավրորա» մարդասիրական կազմակերպության համահիմնադիր Նուբար Աֆեյանն անդրադարձել է օկուպացված Արցախի Հանրապետության նախկին պետնախարար Ռուբեն Վարդանյանի նկատմամբ Բաքվում հարուցված ապօրինի և շինծու դատական գործընթացին:
Նա X-ի իր միկրոբլոգում անդրադրձել է Վարդանյանի՝ երեկվա հրապարակած հայտարարությանը:
«Խնդրում եմ կարդալ այս համոզիչ փաստերը: Մենք բոլորս պետք է զգոն մնանք և անենք այն, ինչ կարող ենք՝ խթանելու արդար դատավարության հեռանկարը և խուսափելու գրոտեսկային անարդարությունից»,-գրել է Աֆեյանը։
Հիշեցնենք, որ Ռուբեն Վրադանյանն իր հայտարարության մեջ նշել է, որ ձերբակալման առաջին օրվանից ոչ մի ցուցմունք չի տվել, բացառությամբ առաջին հարցաքննության, երբ ասել է իր անուն-ազգանունը:
«Իմ ստորագրությամբ բոլոր արձանագրությունները կեղծ են: Այդ փաստաթղթերն իրականում գոյություն չունեն: Իմ փաստաբանին և թարգմանչին ստիպել են իրենց ստորագրությունները դնել այդ փաստաթղթերի տակ»,-փոխանցել է նա:
