Գերմանիայի կանցլեր Օլաֆ Շոլցը ՌԴ նախագահ Վլադիմիր Պուտինի հետ հեռախոսազրույցի ընթացքում ուկրաինական պատերազմի վերաբերյալ նրա պատկերացումներում փոփոխություններ չի տեսել։ «Զրույցը շատ մանրամասն էր, դա նպաստեց գիտակցելուն, որ պատերազմի վերաբերյալ Ռուսաստանի նախագահի հայացքներում քիչ բան է փոխվել, և դա այնքան էլ լավ նորություն չէ»,- ասել է Շոլցը լրագրողներին Բեռլինի օդանավակայանում, Բրազիլիայում կայանալիք G20 գագաթնաժողով մեկնելուց առաջ:
Միևնույն ժամանակ, Գերմանիայի կառավարության ղեկավարը նշել է, որ արժեր խոսել Պուտինի հետ՝ ցրելու ցանկացած պատրանք, որ նա կարող էր ունենալ Ուկրաինային ցուցաբերվող հետագա աջակցությունից Արևմուտքի հրաժարվելու վերաբերյալ։ «Կարևոր էր նրան ասել, որ նա չպետք է հույս դնի, որ Գերմանիայի, Եվրոպայի և աշխարհի շատ այլ երկրների աջակցությունը կթուլանա»,- ասել է Շոլցը։
Նոյեմբերի 15-ին Օլաֆ Շոլցը 2022 թվականից ի վեր առաջին անգամ հեռախոսազրույց է ունեցել Վլադիմիր Պուտինի հետ։ Գերմանիայի կանցլերը դատապարտել է Ուկրաինայի դեմ Ռուսաստանի պատերազմը, կոչ է արել Կրեմլին դուրս բերել բանակն ուկրաինական տարածքից և ընդգծել, որ Մոսկվան պետք է պատրաստ լինի Կիևի հետ բանակցություններին՝ հասնելու արդար և կայուն խաղաղության։
Շոլցի հեռախոսազրույցը Պուտինի հետ քննադատել են Ուկրաինայում և Գերմանիայում: