Ռուսերենը շարունակում է մնալ Ռուսաստանի և Հայաստանի միջև համագործակցության կարևոր տարր՝ չնայած երկու երկրների անկախությանը և ինքնիշխանությանը։ Այս մասին, «Սպուտնիկ» գործակալության հայկական ծառայության փոխանցմամբ, ասել է Հայաստանում ՌԴ դեսպան Սերգեյ Կոպիրկինը «Հայաստանի Հանրապետության 2024 թվականի ռուսերենի լավագույն ուսուցիչ» մանկավարժական գերազանցության XV ազգային մրցույթի արդյունքների ամփոփման արարողությանը։
Կոպիրկինի խոսքով՝ Ռուսաստանին և Հայաստանին միավորում են սերտ կապերը տարբեր ոլորտներում՝ տնտեսությունից մինչև մշակույթ։
«Ռուսաստանը եղել և մնում է Հայաստանի ամենամեծ տնտեսական գործընկերը, և ռուսներն ավանդաբար կազմում են դեպի Հայաստան զբոսաշրջային հոսքի մեծ մասը: Սա ընդգծում է ռուսերենի նշանակությունը ոչ միայն մեր միջպետական հարաբերությունների զարգացման, այլև Հայաստանի ներքին ներուժի ամրապնդման գործում»,- նշել է նա։
Դեսպանը նաև կարևորել է ռուսերենի ուսուցիչների առանցքային դերի վրա՝ նրանց աշխատանքը կենսական համարելով Հայաստանում ռուսաց լեզվի խթանման համար։
Նա ընդգծել է, որ մանկավարժական գերազանցության մրցույթը ռուսերենի դիրքերն ամրապնդելու աշխատանքի մի մասն է։ Նրա խոսքով՝ որպես պետական քաղաքականության մաս՝ ռուսերենի պահպանումն ու տարածումն աշխարհում, հատկապես եղբայրական հարաբերություններ ունեցող երկրներում, ինչպիսին Հայաստանն է, շարունակում է առաջնահերթություն մնալ։
«Հուսով եմ՝ ուսուցիչները տեսնում են, թե Ռուսաստանը և նրա ներկայացուցիչները որքան լուրջ են վերաբերվում Հայաստանում ռուսերենի զարգացմանն ու պահպանմանը»,- եզրափակել է Կոպիրկինը:
