Սեպտեմբերի 3-ին «Արմենիա» միջազգային երաժշտական փառատոնով կտրվի Հայաստանի պետական սիմֆոնիկ նվագախմբի 17-րդ համերգաշրջանի մեկնարկը։ Նվագախումբը դասական երաժշտության սիրահարներին խոստանում է հագեցած համերգաշրջան՝ փառատոներ, համերգային երեկոներ, համաշխարհային ճանաչում ունեցող արտիստների ելույթներ, նոր նախագծեր։ Նախատեսված են մի շարք հյուրախաղեր, որոնց ընթացքում, ինչպես միշտ, կներկայացվեն նաև հայ կոմպոզիտորների ստեղծագործություններ։
Նախորդ համերգաշրջանում Հայաստանի պետական սիմֆոնիկ նվագախմբի աջակցման հիմնադրամի ներքո ձևավորվեց պատվավոր խորհուրդ, որի նախագահն Առաջատար տեխնոլոգիաների ձեռնարկությունների միության նախագահ Ալեքսանդր Եսայանն է։ Պատվավոր խորհրդի կազմում են մի շարք հեղինակավոր ընկերությունների ղեկավարներ։
Մաեստրո Սմբատյանը նշում է, որ ՏՏ ոլորտի և Ալեքսանդր Եսայանի հետ համագործակցությունը մեկնարկեց 2019 թվականին, երբ Հայաստանում անցկացված տեղեկատվական տեխնոլոգիաների WCIT համաժողովի շրջանակում կայացավ WCIT համաշխարհային նվագախմբի համերգը, որի ընթացքում ներկայացվեց արհեստական բանականության ստեղծած երաժշտությունը։
«Կարևորում և բարձր եմ գնահատում նվագախմբի համագործակցությունը Ալեքսանդր Եսայանի և տեղեկատվական տեխնոլոգիաների ոլորտի մեր ընկերների հետ։ Ուրախ ենք, որ կան մարդիկ, որոնց հետ կարող ենք կիսվել մեր ծրագրերով, և որոնք օգնում են մեզ՝ դրանք կյանքի կոչելու գործում։ Համագործակցության սկզբից ևեթ հասկացանք, որ կա ընդհանուր քիմիա ՏՏ աշխարհի ու նվագախմբի միջև։ Այդ ընդհանուր քիմիան էլ մեզ ուղղորդեց ստեղծել պատվավոր խորհուրդը։ Կարծում եմ՝ երաժշտությունը, որ ժամանակից դուրս է, և ՏՏ աշխարհը, որ մեզ դեպի վաղը տանող գլխավոր ուժն է, կարող են շատ արդյունավետ համագործակցել, ունենալ ապագա։ Հպարտ եմ, որ շատ կայացած մարդիկ, ընկերություններ կանգնած են մեր նվագախմբի կողքին, և դա նաև մեր հրաշալի թիմի աշխատանքի արդյունքն է, որը ղեկավարում է Նվագախմբի գլխավոր տնօրեն Արմեն Թավադյանը, և իր հմուտ առաջնորդության շնորհիվ շատ շուտով կկարողանանք խոսել նվագախմբի ավելի մեծ երազանքների իրականացման մասին»,- նշեց Սերգեյ Սմբատյանը։
02/09/2022
Հեղինակ՝ Էմմա Սարգսյանը
