Անահիտ աստվածուհու գլխի և ձեռքի ժամանակավոր տեղափոխման, պահպանության և ցուցադրության համար ՀՀ պետական բյուջեից հատկացվել է շուրջ 69 մլն ՀՀ դրամ:
Այս մասին Tert.am-ի գրավոր հարցմանն ի պատասխան հայտնել են ԿԳՄՍ նախարարությունից:
Նախարարության գործընկերն ու աջակիցն է եղել նաև «Կերոն» զարգացման հիմնադրամը:
Նախարարությունից նաև տեղեկացրել են, որ ՀՀ կրթության, գիտության, մշակույթի և սպորտի նախարարությունը «Մայր աստվածություն, Անահիտից Մարիամ» ժամանակավոր ցուցադրության կազմակերպման և հանրահռչակման իրականացման, ինչպես նաև բացման արարողության կազմակերպան համար Մշակույթի զարգացման հիմնադրամի հետ կնքել է 07.08.2024 թ. N ՄՇԴ-356-2024 և 20.09.2024 թ. N ՄՇԴ-391-2024 պայմանագրերը, որոնք տեղադրված են նախարարության պաշտոնական կայքում:
Հիշեցնենք, որ Անահիտ աստվածուհու բրոնզաձույլ գլուխն ու ձեռքը, որ պահվում են Բրիտանական թանգարանում սեպտեմբերի 21-ից ցուցադրվում են Հայաստանի պատմության թանգարանում, դրանք կցուցադրվեն վեց ամիս Մայր աստվածությանը վերաբերող նմուշների հետ: Ցուցադրությունը կոչվում է «Մայր աստվածություն՝ Անահիտից Մարիամ»:
Անահիտի բրոնզաձույլ արձանը նախկինում երբեք Հայաստանում չի ցուցադրվել։ Ըստ Բրիտանական թանգարանի կայքի՝ Անահիտի պաշտամունքային արձանի այս գլուխը գտնվել է 1870-ականներին՝ Էրզրումի Սաթալա բնակավայրում։ Մի քանի հնավաճառներ այն ձեռքից ձեռք են փոխանցել, ի վերջո, Անահիտի կիսանդրին Բրիտանական թանգարանն է ձեռք բերել։
