Դա շոուի հերթական մաս է կազմում, ակնհայտ է, որ ճնշումների արդյունք է, այդ մարդկանց պատրաստի տեքստերը տվել են, որ խոսեն այդպես. այս մասին լրագրողների հետ զրույցում ասաց «Ապրելու երկիր» կուսակցության համահիմնադիր Մեսրոպ Առաքելյանը՝ անդրադառնալով երեկ Բաքվում Արցախի նախկին պետնախարար Ռուբեն Վարդանյանի դեմ «ցուցմունք» տված հայերին:
Առաքելյանը նշեց, որ անձամբ չի ճանաչում այդ մարդկանց, բայց այդ մարդկանց վարքագիծն ադեկվատ չէ:
«Այդ մարդկանցից մեկը նաև ադրբեջանական մեդիայի հերոսներից մեկն է եղել ու պարբերաբար հենց հակահայկական ուղերձներով է հանդես եկել: Եթե Ադրբեջանը փորձում է նման վկաներով հասկանալ Ռուբեն Վարդանյանի և մյուսների գործունեությունը ինչ է եղել, դրա համար կարող է ոչ թե այս մեկ-երկու մարդկանց այլ 100 հազարավոր արցախցիներ կան, որոնք իրենց կարծիքը Ռուբեն Վարդանյանի և Արցախում տեղի ունեցածի մասին միշտ արտահայտում են, ու եթե արդար դատավարություն է, այդ մարդկանց խոսքն էլ հիմք ընդունեն, ակնհայտ է, որ կքանդվի այդ ամենը, և այդ երկու, այսպես կոչված հայերի ասածները»,- նշեց Առաքելյանը:
Նրա խոսքով՝ «դատավարության» մնացած մասն ուղղակի խայտառակություն է, ֆանտաստիկայի ժանրից : «Մեղադրում էին Ռուբեն Վարդանյանին, ականապատել է Ադրբեջանի վերահսկողության տակ գտնվող տարածքները: Այսինքն, անցել են ադրբեջանական տարածք, ականապատել են. հետո ադրբեջանցիներն այդ ականների վրա տրաքել են ու եկել են, ցուցմունք են տալիս, որ տրաքել են Ռուբեն Վարդանյանի տեղադրած ականների վրա: Հույս ունեմ, որ այս խայտառակ «դատավարության» այս դրվագներով միջազգային հանրությունը գոնե կհասկանա, թե ինչ է կատարվում Բաքվում»,- նշեց նա։
