ԱՄՆ-ի վերջին հարձակումը ցույց տվեց, որ Իրանի միջուկային ծրագրի համար ռազմական լուծում գոյություն չունի, բայց բանակցային լուծում հնարավոր է գտնել. այս մասին Financial Times-ին տված հարցազրույցում ասել է Իրանի ԱԳ նախարար Աբբաս Արաղչին:
«Իսլամական Հանրապետությունը հավատարիմ է իր խաղաղ և ոչ ռազմական միջուկային ծրագրին, չի փոխի իր դոկտրինը և հարգում է առաջնորդ այաթոլլա Ալի Խամենեիի 20-ամյա ֆեթվան, որն արգելում է միջուկային զենքի զարգացումը… Թեհրանը դեռ ունի ուրանի հարստացման կարողություն։ Շենքերը կարող են վերակառուցվել։ Սարքավորումները կարելի է փոխարինել, քանի որ տեխնոլոգիան առկա է։ Մենք ունենք բազմաթիվ գիտնականներ և տեխնիկներ, որոնք նախկինում աշխատել են մեր կայաններում։ Բայց թե երբ և ինչպես ենք վերսկսելու հարստացումը՝ կախված է իրավիճակից», – ասել է Արաղչին։
Նա ընդգծել է, որ «քանի դեռ Թրամփը պահանջում է հարստացման լիակատար դադարեցում, որևէ համաձայնություն հնարավոր չէ»։
«Սակայն Վաշինգտոնը կարող է իր մտահոգությունները ներկայացնել բանակցությունների միջոցով։ Մենք կարող ենք բանակցել, նրանք կարող են ներկայացնել իրենց փաստարկները, և մենք էլ մերն։ Բայց եթե զրոյական հարստացում է պահանջվում, մենք ոչինչ չունենք ասելու», – եզրափակել է Իրանի ԱԳ նախարարը։
Հիշեցնենք, որ հունիսի 22-ին ԱՄՆ օդուժը հարվածներ է հասցրել Իրանում՝ Ֆորդոյում, Նաթանզում և Սպահանում գտնվող երեք միջուկային օբյեկտներին` պնդելով, որ Իրանին թույլ չի տա միջուկային զենք ստեղծել և ուրան հարստացնել։ Օրերս ԱՄՆ նախագահ Դոնալդ Թրամփը հայտարարել էր, որ Միացյալ Նահանգները պատրաստ է նոր հարված հասցնել Իրանի միջուկային օբյեկտներին, եթե վերջինս փորձի վերականգնել դրանք։
«Մենք ոչնչացրել ենք նրանց միջուկային ներուժը։ Նրանք կարող են ամեն ինչ սկսել նորից։ Եթե նրանք դա անեն, մենք կոչնչացնենք (միջուկային օբյեկտները) ավելի արագ, քան դուք կհասցնեք մատ շարժել։ Մենք ստիպված կլինենք դա անել», – ասել էր Թրամփը:
