Շուրջ 5 տարվա քննությունից հետո իրավապահները եզրակացրել են, որ վարչապետ Նիկոլ Փաշինյանի միջնորդությամբ Ազգային հերոսի կոչմանն արժանացած գեներալ Տիրան Խաչատրյանը ձախողել է իրեն վստահված բնագծի պաշտպանությունը: Ըստ Քննչական կոմիտեի՝ բարձրաստիճան զինվորականն իրեն վերապահված առաջադրանքը տապալել է 20 թվականի հոկտեմբերի 7-ից 17-ն ընկած ժամանակահատվածում։
Վարչապետ Փաշինյանն, ի դեպ, հոկտեմբերի 20-ին, այսինքն՝ դրանից ընդամենը մի քանի օր անց է որոշել՝ Տիրան Խաչատրյանին պետք է Ազգային հերոսի կոչում շնորհել:
«Անհասկանալի է։ Այդ գործողություններից հետո պարոն Խաչատրյանին Ազգային հերոսի կոչում են շնորհում, և անցնում է դրանից 4.5 տարի, այդ նույն գործողությունների համար մեղադրանք են առաջադրում ու կալանավորում», — «Ազատության» հետ զրույցում ասաց նրա փաստաբան Արմեն Անդրիկյանը։
Գեներալ-լեյտենանտի պաշտպանականը թիմը պնդում է՝ թե՛ Խաչատրյանի կալանավորումը, թե՛ նրան առաջադրված մեղադրանքը զուրկ են իրավական հիմքերից: Ծավալուն քրեական գործից երեկ Քննչական կոմիտեն որոշ մանրամասներ հայտնեց:
Իրավապահները պնդում են, թե Խաչատրյանը, որ 44-օրյա պատերազմի ընթացքում զորքերի հարավային խմբավորման հրամանատարն էր, անփույթ է վերաբերել իր ծառայողական պարտականություններին: Ավելի կոնկրետ՝ չի ստեղծել հարավային խմբավորման կառավարման կետ՝ իր բոլոր տարրերով և մարտական գործողությունների վարման ընթացքում լիարժեք չի կատարել կառավարմանը բնորոշ մի շարք միջոցառումներ, ինչն անզգուշությամբ առաջացրել է ծանր հետևանքներ։
Գեներալ-լեյտենանտի փաստաբան Արմեն Անդրիկյանը հակադարձեց, թե երկու մասով էլ իրավապահների պնդումներն իրականության հետ կապ չունեն:
«Այո, ինչ-որ հետևանքներ տեղի են ունեցել, իրադարձություններ, որ ասում եք, տեղի են ունեցել, բայց դրանք կապված չեն Տիրան Խաչատրյանի կողմից դրսևորված, այսպես կոչված, անփույթ վերաբերմունքի հետ։ Մենք ասում ենք, որ անփույթ վերաբերմունք չի եղել, այն գործողությունները կան անգործությունը, որոնք որ ՔԿ-ի կողմից մեղադրանքում նշվել է, չեն եղել, և դա որևէ պատճառահետևանքային կապի մեջ չի գտնվում Տիրան Խաչատրյանի գործողությունների և հետևանքերի միջև», — ասաց նա։
Կոմիտեից պնդում են, թե նախկին բարձաստիճան զինվորականի գործողությունների հետևանքով է ձախողվել տվյալ հատվածի բնագծի պաշտպանությունը, խարխլվել զորքերի կառավարման համակարգը, որի հետևանքով հակառակորդը տիրացել է ոչ միայն ռազմավարական բարձունքի, այլև իր տիրապետության տակ է վերցրել խմբավորման պաշտպանությանը հանձնված տարածքները։
Հիշեցնենք, որ Տիրան Խաչատրյանը կալանավորվել է:
