Միացյալ Նահանգների նախագահ Դոնալդ Թրամփը ստորագրել է գործադիր հրամանագիր, որով 90 օրով դադարեցվում են Միացյալ Նահանգների արտասահմանյան օգնության բոլոր ծրագրերը՝ պարզելու համար՝ արդյոք դրանք համապատասխանում են Թրամփի քաղաքական նպատակներին: Այս մասին գրում է Associated Press-ը:
Առայժմ հայտնի չէ, թե աջակցության որ տեսակների վրա կանդրադառնա հրամանագիրը, քանի որ արտասահմանյան օգնության շատ ծրագրերի ֆինանսավորումն արդեն հատկացվել է Կոնգրեսի կողմից և պարտավոր է կյանքի կոչվել:
Հրամանագրում ասվում է, որ «օտարերկրյա օգնության ինդուստրիան և բյուրոկրատիան համահունչ չեն ամերիկյան շահերին և շատ դեպքերում հակասում են ամերիկյան արժեքներին» և «ապակայունացնում են համաշխարհային խաղաղությունը՝ խթանելով գաղափարներ օտար երկրներում, որոնք ուղղակիորեն հակասում են երկրներում և երկրների միջև ներդաշնակ և կայուն հարաբերություններին»:
Հետևաբար, Թրամփը հայտարարել է, որ «Միացյալ Նահանգների հետագա արտաքին օգնությունը չպետք է տրամադրվի, եթե դա լիովին չհամապատասխանի Միացյալ Նահանգների նախագահի արտաքին քաղաքականությանը»: Պետքարտուղար Մարկո Ռուբիոն անցյալ շաբաթ Սենատի արտաքին հարաբերությունների հանձնաժողովի անդամներին ասել էր, որ «յուրաքանչյուր դոլար, որը մենք ծախսում ենք, յուրաքանչյուր ծրագիր, որը մենք ֆինանսավորում ենք, և յուրաքանչյուր քաղաքականություն, որը մենք վարում ենք, պետք է հիմնավորվի երեք պարզ հարցերի պատասխանով. «Արդյո՞ք դա Ամերիկան ավելի անվտանգ է դարձնում, արդյո՞ք դա ավելի ուժեղ է դարձնում Ամերիկան, արդյո՞ք դա Ամերիկան ավելի բարգավաճ է դարձնում»»:
Ջո Բայդենի վարչակազմի կառավարման վերջին տարում 68 միլիարդ դոլար է հատկացվել արտասահմանում իրականացվող ծրագրերի համար, որոնք վերաբերում են տարատեսակ բնագավառների, այդ թվում՝ 204 երկրներում և տարածաշրջաններում աղետներից տուժածներից օգնելուն, առողջապահական և ժողովրդավարական նախաձեռնությունները խթանելուն: ԱՄՆ-ի օգնության ամենամեծ շահառուները` Իսրայելը (տարեկան 3,3 միլիարդ դոլար), Եգիպտոսը (տարեկան 1,5 միլիարդ դոլար) և Հորդանանը (տարեկան 1,7 միլիարդ դոլար), դժվար թե տեսնեն կտրուկ կրճատումներ, քանի որ այդ գումարները ներառված են երկարաժամկետ փաթեթներում և որոշ դեպքերում կարգավորվում են պայմանագրային պարտավորություններով:
Հիշեցնենք, որ Թրամփը երկուշաբթի երեկոյան առաջին անգամ ժամանել է Սպիտակ տուն՝ որպես Միացյալ Նահանգների 47-րդ նախագահ և անմիջապես գնացել Օվալաձև աշխատասենյակ, որտեղ ստորագրել է նախապես հայտարարած գործադիր հրամաններից շատերը։
Առաջիններից մեկը 2021 թվականի հունվարի 6-ին Կապիտոլիումի գրոհի 1,000-ից ավելի մասնակիցներին ներում շնորհելու հրամանն էր. խոսքն այն գրոհի մասին է, երբ Թրամփի կողմնակիցները փորձել են կանխել Ջո Բայդենի հաստատումը որպես նախագահ և անկարգություններ են սկսել Վաշինգտոնում:
«Հուսով եմ՝ նրանք այսօր ազատ կարձակվեն… շուրջ 1,500 մարդ»,- ասել է Թրամփը։
Ավելի ուշ ամերիկյան լրատվամիջոցները պարզաբանել են, որ Թրամփը սխալ է արտահայտվել՝ իրականում ներում է ստացել մոտ 1600 մարդ։
Թրամփը նաև գործադիր հրամաններ է ստորագրել Առողջապահության համաշխարհային կազմակերպությունից ԱՄՆ-ի դուրս գալու գործընթացի մեկնարկի, ԱՄՆ-ում TikTok սոցիալական ցանցի աշխատանքի դադարեցումը 75 օրով հետաձգելու, հարավային սահմանին արտակարգ ռեժիմի ներդրելու վերաբերյալ, ինչպես նաև հայտարարել է Կանադայի և Մեքսիկայի դեմ մաքսատուրքեր սահմանելու մասին։
Ընդհանուր առմամբ, Թրամփը չեղարկել է նախկին նախագահ Ջո Բայդենի ստորագրած 78 գործադիր հրամաններ ու հուշագիր: