ԱՄՆ-ն և Իրանը հասել են խաղաղ համաձայնության, կիրակի օրը հայտնել է Դոնալդ Թրամփը։
«Շնորհավորում եմ բոլորին։ Ես լիովին թույլատրում եմ Հորմուզ նեղուցի բացումը և ռազմածովային շրջափակման անհապաղ դադարեցումը։ Աշխարհի բոլոր նավերը, գործարկեք շարժիչները։ Թող նավթը հոսի», — Truth Social-ում գրել է Թրամփը։
Իրանական Mehr գործակալության փոխանցմամբ՝ ԱՄՆ-ի և Իրանի միջև խաղաղության համաձայնագրի նախագիծը բաղկացած է 14 կետից.
- Ռազմական գործողությունների անհապաղ և մշտական դադարեցում բոլոր ճակատներում, ներառյալ Լիբանանում։
- ԱՄՆ-ը պարտավորվում է չմիջամտել Իրանի ներքին գործերին և հարգել նրա ինքնիշխանությունը։
- Ծովային շրջափակման ամբողջական վերացում 30 օրվա ընթացքում։
- ԱՄՆ-ը պարտավորվում է դուրս բերել իր զորքերը Իրանի շուրջ գտնվող շրջաններից։
- Իրանի համաձայնությամբ 30 օրվա ընթացքում վերագործարկվելու է Հորմուզի նեղուցը։
- Կասեցվելու են նավթի, նավթաքիմիական արտադրանքի և դրանց ածանցյալների վաճառքի նկատմամբ պատժամիջոցները, իսկ Իրանին կտրամադրվի լիարժեք հասանելիություն իր ֆինանսական ակտիվներին։
- ԱՄՆ-ը և նրա դաշնակիցները կտրամադրեն Իրանի վերականգնման ծրագրեր՝ առնվազն 300 միլիարդ դոլարի չափով։
- 60 օրվա ընթացքում կանցկացվեն բանակցություններ՝ միջուկային հարցերի շուրջ վերջնական համաձայնության հասնելու, ինչպես նաև ԱՄՆ-ի առաջնային ու երկրորդային պատժամիջոցներն ու ՄԱԿ-ի Անվտանգության խորհրդի և ՄԱԳԱՏԷ-ի որոշումները վերացնելու նպատակով։
- Իրանը վերահաստատում է իր հավատարմությունը Միջուկային զենքի չտարածման պայմանագրին և պարտավորվում է չարտադրել միջուկային զենք։
- ԱՄՆ-ը պարտավորվում է չավելացնել տարածաշրջանում իր զորքերի թվաքանակը և չսահմանել նոր պատժամիջոցներ։
- Վերջնական բանակցությունների 60-օրյա ընթացքում կազատվի Իրանի սառեցված 24 միլիարդ դոլարը, որի կեսը պետք է տրամադրվի մինչև բանակցությունների մեկնարկը։
- Կստեղծվի համաձայնագրի իրագործման վերահսկման մեխանիզմ։
- Վերջնական համաձայնագիրը կհաստատվի ՄԱԿ-ի Անվտանգության խորհրդի բանաձևով։
- Վերջնական բանակցությունները չեն սկսվի, քանի դեռ չեն ազատվել Իրանի սառեցված միջոցների կեսը, չեն կասեցվել իրանական նավթի նկատմամբ պատժամիջոցները և չի վերացվել ծովային շրջափակումը։ Վերջնական համաձայնությունը կվերաբերի բացառապես հարստացված նյութերի և ուրանի հարստացման ճակատագրին, պատժամիջոցների վերացմանն ու Իրանի տնտեսական վերականգնման ծրագրին։ Իրանական հրթիռային ծրագրի և դիմադրության խմբավորումներին աջակցության հարցերը վերջնականապես դուրս են բերվել օրակարգից։
