ԱՄՆ նախագահ Դոնալդ Թրամփը հայտարարել է, որ Միացյալ Նահանգների, Ռուսաստանի և Ուկրաինայի ներկայացուցիչները կհանդիպեն փետրվարի 14-ին, Մյունխենի անվտանգության համաժողովի շրջանակում՝ ռուս-ուկրաինական պատերազմին վերջ տալու ուղիները քննարկելու համար: Այս մասին գրում է BBC-ն:
«Ռուսաստանը այնտեղ կլինի մեր մարդկանց հետ: Ի դեպ, հրավիրված է նաև Ուկրաինան։ Ես վստահ չեմ, թե կոնկրետ որ երկրներից ով է լինելու այնտեղ, սակայն լինելու են բարձրաստիճան պաշտոնյաներ Ռուսաստանից, Ուկրաինայից և ԱՄՆ-ից»,- ասել է Թրամփը Սպիտակ տանը լրագրողների հետ զրույցում:
Այնուամենայնիվ, Ռուսաստանը, որը պաշտոնապես չի մասնակցում Գերմանիայում անցկացվող ամենամյա ֆորումին, չի մեկնաբանել, իսկ ուկրաինացի բարձրաստիճան պաշտոնյան ասել է, որ «ռուսների հետ բանակցությունները Մյունխենում չեն սպասվում»:
Եթե բոլոր երեք երկրների պաշտոնյաները մասնակցեն, դա կլինի Ռուսաստանի և Ուկրաինայի ներկայացուցիչների առաջին հանդիպումը 2022 թվականից ի վեր։ Կիևը դադարեցրեց խաղաղ բանակցությունները ռուսական կողմի հետ 2022 թվականի մայիսին։ Նույն թվականի հոկտեմբերին Ուկրաինայի նախագահ Վլադիմիր Զելենսկին հրամանագիր է ստորագրել, որով բացառվում է Ռուսաստանի նախագահ Վլադիմիր Պուտինի հետ հետագա բանակցությունների հնարավորությունը։
Հիշեցնենք, որ փետրվարի 12-ին, հեռախոսազրույց է տեղի ունեցել Պուտինի և Թրամփի միջև։ ՌԴ նախագահի մամուլի քարտուղար Դմիտրի Պեսկովը հայտնել է, որ կողմերը պայմանավորվել են անձնական հանդիպում կազմակերպել։ Կրեմլի ներկայացուցչի խոսքով՝ Պուտինն ԱՄՆ նախագահին հրավիրել է Մոսկվա։ Թրամփը, խոսելով հնարավոր հանդիպման մասին, նշել է, որ այն տեղի կունենա «ոչ հեռու ապագայում»։
«Համաձայնեցինք, որ ցանկանում ենք դադարեցնել ռուս-ուկրաինական պատերազմը։ Պուտինն անգամ օգտագործեց իմ քարոզարշավի կարգախոսը՝ «Ողջախոհություն»։ Պայմանավորվեցինք աշխատել միասին, շատ սերտ՝ ներառյալ փոխադարձ այցեր ունենալով։ Պայմանավորվեցինք, որ մեր թիմերն անհապաղ կսկսեն բանակցությունները։ Ես անմիջապես կզանգահարեմ Ուկրաինայի նախագահ Զելենսկիին, որպեսզի տեղեկացնեմ այս զրույցի մասին»,-զրույցի մասին ասել է Թրամփը։
