ԱՄՆ նախագահ Դոնալդ Թրամփը կարծում է, որ ներկայումս Միացյալ Նահանգներն ավելի շատ պետք է անհանգստանա ներքին խնդիրներով, այլ ոչ թե Ռուսաստանի հետ հարաբերություններով։
«Մենք պետք է ավելի քիչ անհանգստանանք Պուտինի և ավելի շատ մեր երկիր մուտք գործող ավազակախմբերի, նարկոբարոնների, մարդասպանների և հոգեբուժարաններից փախածների դեմ պայքարելու համար, որպեսզի չհայտնվենք Եվրոպայի վիճակում»,- գրել է Թրամփը The Truth Social-ի իր էջում:
Թրամփի վարչակազմի՝ իշխանության ղեկին գտնվելու առաջին շաբաթների ընթացքում ձերբակալվել է մոտ 3 հազար ապօրինի միգրանտ, այն դեպքում, երբ, ըստ առկա տվյալների, երկրում ապրում է մինչև 11 մլն անօրինական ներգաղթյալ:
ԱՄՆ նախագահը սկսել է խստացնել միգրացիոն ռեժիմը, ինչը խոստացել էր նախընտրական քարոզարշավի ընթացքում, այդ թվում՝ անօրինական ներգաղթյալներով ինքնաթիռներ է ուղարկում նրանց հայրենի երկրներ, օրինակ՝ Կոլումբիա և Հնդկաստան:
Ավելի վաղ՝ փետրվարին, Թրամփը կարգադրել էր ուժեղացնել անվտանգության միջոցառումները երկրի հարավային սահմանի երկայնքով: Բացի այդ, ԱՄՆ զինված ուժերը բարձր տեխնոլոգիական հետախուզական ինքնաթիռների օգնությամբ հետևում են մեքսիկական թմրակարտելներին: Մոտ 18 թռիչք է կատարվել Ամերիկայի հարավարևմտյան հատվածի վրայով ու Կալիֆոռնիայի թերակղզու շրջակայքում գտնվող միջազգային օդային տարածքում:
