ԱՄՆ նախագահը պատժամիջոցներ է սահմանել Միջազգային քրեական դատարանի դեմ, իր խոսքով՝ «ԱՄՆ-ի և Իսրայելի դեմ ապօրինի և անհիմն գործողությունների» համար:
Դոնալդ Թրամփի ստորագրած հրամանագրում նշվում է, որ Հաագայի դատարանը չարաշահել է լիազորությունները՝ Իսրայելի վարչապետ Բենիամին Նեթանյահուի և պաշտպանության նախկին նախարար Յոավ Գալանտի ձերբակալման օրդերներ տալով: ՄՔԴ-ն նաև նախնական հետաքննություն է սկսել ամերիկյան անձնակազմի նկատմամբ։
Փաստաթղթում նաև նշվում է, որ ՄՔԴ-ն իրավասություն չունի ԱՄՆ-ի կամ Իսրայելի նկատմամբ, քանի որ երկրներից ոչ մեկը Հռոմի կանոնադրության կողմ կամ դատարանի անդամ չէ: ՄՔԴ-ի պաշտոնատար անձանց, աշխատակիցների և գործակալների ու նրանց մերձավոր ազգականների նկատմամբ սահմանվում են ֆինանսական և վիզային սահմանափակումներ:
Նեթանյահուն շնորհակալություն է հայտնել Թրամփին՝ դատարանի նկատմամբ պատժամիջոցներ սահմանելու համար: Նա դատարանը անվանել է կոռումպացված կառույց, նշել՝ ՄՔԴ-ի իրավասությունը չեն ճանաչում այն երկրները, որտեղ բնակվում է Երկիր մոլորակի բնակչության կեսից ավելին, այդ թվում՝ ԱՄՆ-ը, Չինաստանը, Հնդկաստանը, Ռուսաստանը, Սաուդյան Արաբիան։
Նիդերլանդների արտաքին գործերի նախարար Կասպար Վելդկամպն էլ ափսոսանք է հայտնել Հաագայի դատարանի դեմ պատժամիջոցների կապակցությամբ, նշել՝ դատարանի աշխատանքը կարևոր նշանակություն ունի անպատժելիության դեմ պայքարում:
«Մեր երկիրն ունի ամուր հեղինակություն և պատասխանատվություն՝ որպես միջազգային կարևոր իրավական ինստիտուտներ ընդունող երկիր: Նիդերլանդներն ակտիվորեն նպաստում է միջազգային իրավակարգի և բազմակողմ համագործակցության ամրապնդմանը և բարեխղճորեն կատարելու է դրա համար պարտադիր միջազգային իրավական և պայմանագրային պարտավորությունները»,- նշել է Վելդկամպը:
