ՀՀ ֆինանսների նախարարությունը պարզաբանում է տարածել՝ անդրադառնալով սոցիալական հարթակներում շրջանառվող, իրենց ձևակերպմամբ, իրականությանը չհամապատասխանող տեղեկություններին։
Նախարարության հաղորդմամբ՝ ԱՐՔԱ վճարային համակարգի միջոցով իրականացվող անկանխիկ վճարումների դեպքում գործող 2 տոկոս հետվճարի միջոցառման շրջանակում «Արմենիան Քարդ» ՓԲԸ-ն չի փոխանցելու և չի տրամադրելու ՀՀ ֆինանսների նախարարությանը քաղաքացիների կողմից իրականացված գործարքների վերաբերյալ որևէ անձնական տվյալ կամ բանկային գաղտնիք հանդիսացող տեղեկություն։
Պաշտոնական հաղորդագրությունում ընդգծվում է, որ քաղաքացիների տվյալների փոխանցման վերաբերյալ շրջանառվող լուրերը չեն համապատասխանում իրականությանը։
ՀՀ ֆինանսների նախարարությունը քաղաքացիներին կոչ է անում առաջնորդվել բացառապես պաշտոնական աղբյուրներից ստացվող տեղեկատվությամբ և չտրվել ապատեղեկատվությանը։
