Հակակոռուպցիոն դատարանը Գյումրու քաղաքապետ Վարդան Ղուկասյանի նկատմամբ որպես խափանման միջոց ընտրեց բացակայելու արգելքը և կիրառեց 5 մլն դրամ գրավ։ Այս մասին գրում է Սպուտնիկ Արմենիան:
Նշենք, որ Վարդան Ղուկասյանի դեմ գործը կապված է Գյումրի համայնքին պատկանող 22 գույքի ապօրինի օտարման հետ։
Ղուկասյանը դատարանի դիմաց լրագրողների հետ զրույցում վստահեցրեց, որ գրավը վճարելու խնդիր չի ունենա։
«Ես այնքան հարգանք ունեմ, որ հիմա աշխարհի որ երկիրը զանգեմ ու ասեմ՝ ինձ 500 հազար դոլար է պետք, 50 հազար դոլար է պետք, երկու րոպե հետո կբերեն, կտան Ղուկասյանին։ Հետո՝ ես փոքրուց աշխատել եմ»,- ասաց նա։
Ղուկասյանի խոսքով՝ Գյումրիում բոլորը միմյանց ճանաչում են, հիշեցրեց, որ մի քանի անգամ քաղաքապետ, 2 անգամ էլ ԱԺ պատգամավոր է ընտրվել։
«Եթե ես ինչ-որ մի բան արած լինեի, ուրեմն ես չէի ընտրվի։ Հիշեք, ընտրվելու եմ. ինչքան առաջադրվեմ, այնքան անցնելու եմ»,- ասաց Ղուկասյանը։
Դիտարկմանը, որ այսօր Ղուկասյանը քննադատում է իշխանությանը, սակայն 2018 թվականին աջակցում էր Նիկոլ Փաշինյանին, Ղուկասյանն արձագանքեց` ասելով, թե ինքը պարզապես նախկին իշխանություններին է դեմ եղել։
«Ես դեմ եմ եղել նախկին իշխանությանը, և դրա համար Նիկոլ կլիներ, Պողոս Երվանդյան կլիներ, ով ուզում է լիներ, նա անցնելու էր։ Ոչ թե Փաշինյան Նիկոլն այդքան ձայներ ունի, այլ նախկինների նկատմամբ ատելությունից ժողովուրդն ուզեցել է պրծնել և ընտրել է Նիկոլ Փաշինյանին։ Բոլորը լավ գիտեն, իրենք էլ լավ գիտեն։ Հիմա ինձ ասել, թե դուք ՔՊ-ին պաշտպանեցիք, էս արեցիք կամ այն արեցիք, ես ՔՊ-ի վարքագիծը տեսնելով՝ երբեք չեմ պաշտպանի»,- շարունակեց նա։
Վարդան Ղուկասյանը նաև հակադարձեց դիտարկմանը, թե նախկին իշխանության ձայնով է ինքն ընտրվել քաղաքապետ։
«Սխալվում եք, դուք այդպես եք ուզում, այդպիսի հանձնարարական եք ստանում, որ ինձ կապեն նախկինների հետ։ Ամբողջ քաղաքը գիտի, որ ես նախկինների հետ կապ չունեմ, ուղղակի չորսի մեջ հարգել եմ Ռոբերտ Քոչարյանին։ Թե չէ ես ընդհանրապես նախկինների հետ կապ չունեմ, հետո Երևանյան քաղաքական խաղերից շատ հեռու եմ ես»,– ընդգծեց Վարդան Ղուկասյանը։
Հիշեցնենք, որ Վարդան Ղուկասյանը Գյումրու քաղաքապետ է ընտրվել այս տարվա ապրիլի 16-ին։
