ԱՄՆ պետքարտուղարը Fox News-ի հետ հարցազրույցում կարծիք է հայտնել, որ Վաշինգտոնը պետք է ավելի շատ ճնշում գործադրի Իրանի վրա:
«Դա պետք է արվի, քանի դեռ նրանք փորձում են միջուկային զենք ստանալ»,- հավելել է Մարկո Ռուբիոն:
Պետքարտուղարը մեկնաբանել է նաև USAID-ի շուրջ ստեղծված իրավիճակը: Նա հայտարարել է, որ ԱՄՆ Միջազգային զարգացման գործակալությունը ծախսում է ամերիկացիների հարկերը՝ առանց հաշվի առնելու երկրի ազգային շահերը, ու միաժամանակ կարծում, թե իր «տերն աշխարհն է, այլ ոչ Միացյալ Նահանգները»:
«Կան ծրագրեր, որոնք մենք իրականացնում ենք USAID-ի միջոցով, և պետք է շարունակենք այդ գործընթացը: Այժմ հարկավոր է հասկանալ՝ դա անել Պետքարտուղարությա՞ն միջոցով, թե՞ բարեփոխել USAID-ն»,- մանրամասնել է Ռուբիոն:
Նա անդրադարձել է Պանամայի ջրանցքի հարցին, նշել՝ այն չպետք է գործիք դառնա այլ երկրների համար՝ վտանգելու Միացյալ Նահանգների ազգային անվտանգությունը: Ռուբիոն հավելել է՝ Վաշինգտոնը չի կարող թույլ տալ, որ Չինաստանը որևէ վերահսկողություն ունենա ջրանցքի նկատմամբ:
