ԱՄՆ փոխնախագահ Ջ.Դ. Վենսը չի բացառել Վաշինգտոնի կողմից Իրանի դեմ ռազմական գործողությունների վերսկսման հնարավորությունը։
Վենսը այս հայտարարությունն արել է Վիրջինիայում լրագրողների հետ զրույցում։
Նրա խոսքով՝ ԱՄՆ հետագա գործողությունները կախված կլինեն Իրանի վարքագծից։
«Ես ոչինչ չեմ կարող խոստանալ։ Վերջին հաշվով, ամեն ինչ կախված կլինի Իրանի վարքագծից։ Միակ բանը, որում ես վստահ եմ, այն է, որ նախագահը կրկին մեր զորքերը չի ուղարկի, եթե բացարձակապես անհրաժեշտ չէ և հստակ սահմանված նպատակ չկա», — ասել է նա։
Փոխնախագահը նաև նշել է, որ եթե Իրանը վերսկսի իր միջուկային ծրագիրը կամ կրկին սկսի հարձակվել առևտրային նավերի վրա, դա կփոխի ԱՄՆ մոտեցումը։
Բացի այդ, Վենսը բարձր է գնահատել ԱՄՆ և Իրանի պաշտոնյաների միջև տեխնիկական խորհրդակցությունների ընթացքը։
«Դեռ վաղ է խոսել արդյունքների մասին, բայց բանակցությունները լավ են ընթանում», — հավելել է նա։